Jedel járdem qyzmeti avtokólik qoryn jańartty

«Jedel járdem – halyqqa shuǵyl medısınalyq kómek kórsetýdiń mańyz­dy salasy. Onsyz densaýlyq saqtaý salasyn kózge elestetý múmkin emes. Qandaı jaǵdaı bolmasyn, adamdarǵa birinshi bolyp kómekke umtylatyn jedel járdem qyzmetiniń mamandary. Sondyqtan osy sala qyzmetkerlerine múm­kindiginshe jaǵdaı jasalýy kerek. Búginde memleket halyqtyń densaýly­ǵyn nyǵaıtý maqsatynda kóp jumys atqaryp otyr. Sonyń ishinde megapolıs medısınasy keıingi jyldary erekshe damyp keledi. Kóptegen mekeme jańa medısınalyq quraldarmen jabdyqtaldy. Dárigerler shetelde tájirıbe almasyp, biliktiligin arttyryp jatyr. Osynyń nátıjesinde densaýlyq saqtaý salasynyń deńgeıi joǵarylady. Shymkent elimizdiń medısınalyq týrızmine aınalyp keledi. Qala men óńirlerden bólek, shetelden de Shymkentke kelip emdelip jatqandar bar. Medısına salasynyń ishinde jedel járdem qyzmeti de keıingi jyldary erekshe qarqynmen damı bastady. Bul qyzmettiń jumysyn ońtaılandyrý nátıjesinde qazirde jedel járdemniń shuǵyl kómek kórsetýdegi tıimdiligi arta tústi. Memleket osy baǵyttaǵy jumy­syn jalǵastyrady. Jedel járdem qyzmeti mamandarynyń biliktiligin kúsheıtý, sońǵy úlgidegi qural­darmen jabdyqtaý, medısına qyzmet­kerleriniń qaýipsizdigin qamtamasyz etý qashan da kún tártibindegi mańyzdy áleýmettik ári quqyqtyq máseleniń biri bolyp qala beredi», dedi Ǵ.Syzdyqbekov.

Megapolıs basshysy sondaı-aq medı­sına uıymdary men shuǵyl qyzmetter­diń materıaldyq-tehnıkalyq bazasyn ja­ńartý ákimdik jumysynyń negizgi min­detteriniń biri ekenin erekshe atap ótti. Sonyń ishinde jedel járdem avtoparkin jańartý – halyqqa kórsetiletin shuǵyl medısınalyq kómektiń sapasy men jedel­digin arttyrýdaǵy mańyzdy qadam.

Aıta ketken jón, «Hyundai Staria» mar­kaly jańa sanıtarlyq avto­kólik­ter zamanaýı medısınalyq qural-jab­­dyq­tarmen tolyq jabdyqtal­ǵan. Kólikterde kardıo­graftar, defı­brıllıator-monı­torlar, ókpeni jasan­dy jeldetý apparattary, elektrli sorǵysh­tar, ottegi ballondary, arnaıy zembilder men qorǵanysh qalqandary qarastyrylǵan.

Sonymen qatar saltanatty is-shara barysynda densaýlyq saqtaý uıym­daryna «Al-Farabı farm Ltd» JShS demeýshiligimen satyp alynǵan medı­sı­nalyq jabdyqtardyń arnaıy sertıfı­kat­tary tabystaldy. Atalǵan jabdyqtar qatarynda jańa týǵan nárestelerge ar­nal­ǵan ınkýbatorlar, fýnksıonaldyq, rea­­nımasııalyq tósekter bar. Mundaı me­dı­sınalyq quraldar nárestelerdiń kú­ti­­min jeńildetýge, aýyr haldegi naýqas­tar­ǵa kóp járdemin tıgizýge múmkindik beredi.

Jaýapty mamandar densaýlyq saq­taý salasyn jańartý men Shymkent tur­ǵyndaryna medısınalyq qyzmettiń qol­jetimdiligin arttyrý baǵytyndaǵy júıeli jumys toqtaýsyz jalǵasa bere­tinin tilge tıek etti. Búginde qalalyq medı­sınalyq jedel járdem qyzmeti 10 qosalqy stansa bazasynda qyzmet kórsetedi. Táýlik boıy turǵyndarǵa 115 brıgada shaqyrtýlarǵa shuǵyl túrde shy­ǵyp otyrady. Medısınalyq mamandar tobynyń ishinde 28 dárigerlik, 87 feld­sherlik brıgada bar.

ShYMKENT