Búginde salada ınfraqurylymdy jańǵyrtý, sıfrlandyrý men balamaly energııa kózderin damytý baǵytynda mańyzdy jobalar júzege asyrylyp jatyr. Bul – energetıkterdiń kásibıligi men jaýapkershiliginiń aıqyn kórinisi. Energetıkter eńbegi – senimdi energııa, turaqty ekonomıka, jarqyn bolashaqtyń kepili.
Elimiz eńbegimizdi elep, Prezıdentiniń qatysýymen marapattap jatqany úshin alǵysymyz sheksiz. Árbir eńbekqor eńbekshi-jumysshynyń eńbegi eskerilip, mereıi óskeni – bizge úlken mártebe. Máselen, meniń áriptesterim ýchaske basshysy Sanjar Ámirıev pen ınjener Altynbek Kereev kóptegen jumysshy-eńbekkerdi baýlyp, tárbıelep júr. Keleshekte olardyń da qajyrly eńbegi óz baǵasyn alsa degen tilek bar. Bir bilerim, energetıka – kórinbeıtin, biraq sheshýshi kúsh. Sondyqtan qıyn jaǵdaıda da júıeni toqtatpaı ustap turǵan energetıkterge qurmet árqashan erekshe.
Qaıyrǵalı SISEKENOV,
Batys Qazaqstan oblysy elektrjelilerin taratý kompanııasynyń kólik júrgizýshisi
Mereıimizdi ósirgen qurmet
Energetıkter kúni qarsańynda sala qyzmetkerleri eńbektegi jetistikterine oraı memlekettik jáne vedomstvolyq nagradalarmen marapattaldy. Saltanatty sharada energetıka salasynyń el ekonomıkasyndaǵy strategııalyq róli atap ótildi.
Eńbek adamynyń, energetıka salasy qyzmetkerleriniń eńbegi eskerilip, mereıimizdi ósirgeni úshin Memleket basshysyna alǵys aıtamyn. Bıyl Jumysshy mamandyqtar jylynyń túıindeler ýaqytynda osyndaı eleýli oqıǵaǵa kýá bolyp otyrmyz.
Memlekettik nagradalar –energetıkterdiń kásibıligine, jaýapkershiligine, sondaı-aq el ekonomıkasynyń turaqty damýyna qosqan úlesine berilgen joǵary baǵa. Bul is-shara sala mamandarynyń mártebesin arttyryp, jas býynǵa úlgi kórsetti.
Álııa ELEMANOVA,
Almaty energetıka jáne baılanys ýnıversıtetiniń Dosenti
El ıgiligi jolynda eńbek etý – baqyt
Meniń eńbek jolym 1981 jyly bastaldy. 44 jyl bir salada jumys isteý az ýaqyt emes. Bul bir adamnyń ǵana emes, tutas bir ǵumyrdyń eńbegi dep aıtýǵa bolady. Men – Jambyl oblysy Moıynqum aýdanynyń týmasymyn. Osy óńirde, osy mekemede eńbek ettim. Basqa jaqqa aýysý degen oı bolǵan joq. Sebebi óz jerińde, óz elińe qyzmet etý árdaıym mańyzdy boldy.
О́ndiris úshin, el úshin qandaı paıda tıgizdim dep oılasam, eń aldymen, jaryqtyń úzilmeýi, halyqtyń tynysh ómiri eske túsedi. Elektr jaryǵy kózge kórinbeıdi, biraq onsyz tirshilik toqtap qalady. Biz sol jaýapkershilikti árdaıym sezinip jumys istedik. Qystyń sýyǵynda da, jazdyń aptabynda da jeli qalpyna kelsin dep, kún-tún demeı eńbek ettik.
Buryn tehnıka da az edi, múmkindik te shekteýli boldy. Qazir jaǵdaı ózgerdi, eńbekke degen kózqaras ta, baǵalaý da basqasha. Búgin osyndaı marapat alyp otyrǵanym úshin eń aldymen, memleketke, el basshylyǵyna alǵys aıtamyn. Eńbekti eskerip, qarapaıym jumysshyǵa deıin nazar aýdaryp otyrǵany qýantady.
Astanaǵa arnaıy kelip, osyndaı qurmetke ıe bolý biz úshin úlken mártebe. Bul tek meniń emes, menimen birge jumys istegen barlyq áriptesimniń, energetıka salasynda mańdaı terin tókken jandardyń eńbegine berilgen baǵa dep qabyldaımyn.
Qanatbek ERDILDÁ,
«Jambyl elektr jelileri» sheberi
