Dron basqarýǵa arnalǵan keshendi kýrsty «Ashyq Aspan Foundation» ǵylymı bilim qoǵamdyq qorynyń mamandary ótkizdi. Alǵashqy kezeńde jaýyngerler sımýlıatorlarda jattyǵyp, oqý-drondaryn basqarýdy meńgerdi. Ekinshi kezeńde qatysýshylar drondardyń qurylymyn zerttep, aqaýlaryn jóndeýdi úırendi. Odan soń arnaıy daıyndalǵan top FPV drondaryn kúrdeli operasııalarda qoldaný ádisterin, manevr jasaý taktıkasy men antıdron júıelerimen ózara áreket etý tásilderin zerttedi.
Oqýǵa qatysqan «Barys» laqap atty jaýynger tájirıbeniń mańyzyn erekshe atap ótti.
«Biz bul joly shaǵyn ári asa jyldam FPV drondaryn qoldanýdy úırendik. Mundaı ushý apparattary tapsyrmany oryndaýǵa qolaıly. Ásirese, nysan ishin barlaý, tintý jáne tekserý kezinde taptyrmas qural», deıdi ol.
Sondaı-aq, qatysýshylar arasynda FPV tinywoop saıysy ótkizildi. Munda olar oqyp-úırengenderin kórsetti. Úzdik shyqqandary madaqtamalarmen marapattaldy. Aldaǵy ýaqytta kýrsty jalǵastyrý josparlanyp otyr. Kelesi joly jaýyngerler FPV drondardy tolyǵymen ózderi qurastyryp, tehnıkalyq jóndeýdi tereńirek meńgermek.
Aıta ketsek, bıyldan bastap IIM Ulttyq ulannyń 5573 áskerı bóliminde dron operatorlaryn daıarlaý kýrsy iske qosyldy. Bul sarbazdarǵa zamanaýı áskerı-qoldanbaly daǵdylardy meńgerip, suranysqa ıe mamandyqty ıgerýge múmkindik beredi.
