Festıval qalanyń eń shyǵarmashyl, belsendi jáne talantty joǵary oqý oryndaryn biriktirip, Qaraǵandyny stýdenttik ónerdiń, energııa men tyń ıdeıalardyń ortalyǵyna aınaldyrdy.
Festıvaldiń ashylýy naǵyz mádenı oqıǵaǵa aınaldy. Árbir joǵary oqý orny ózine tán stıldi, minezdi jáne shyǵarmashylyq bolmysty aıqyndaıtyn jeke konserttik nomer usyndy.
Sahna stýdenttik jastar men kásibı ártisterdiń jarqyn óneri toǵysqan, úlken deńgeıdegi shoý alańyna aınaldy.
Ashylý saltanatyna Qazaqstan estradasynyń juldyzdary – Dakelot, Zhenis jáne Qaırat Nurtas arnaıy qatysyp, festıval qonaqtary men qatysýshylaryna erekshe serpin syılady. Olardyń óner kórsetýi jastar bastamalaryn qoldaýdyń mańyzyn aıqyndap, is-sharanyń deńgeıin odan ári kóterdi.
Mýzyka, jaryq, kreatıvti qoıylymdar festıvalge qýatty bastaý berip, kelesi baıqaý kúnderiniń joǵary dınamıkasyn aıqyndady.
Eki kún boıy qatysýshylar vokaldyq sheberligin, bı tehnıkasyn, aspaptyq oryndaý deńgeıin, sahnalyq sóıleý mádenıetin jáne kreatıvti oılaý qabiletterin kórsetti.
Ár nomınasııa stýdentterdiń óz áleýetin ashatyn alańǵa aınalyp, qazylar alqasy ýnıversıtet komandalarynyń daıyndyq deńgeıi men oryndaý sapasyn joǵary baǵalady.
Festıval Qaraǵandy stýdentteriniń kásibı sahnalar men respýblıkalyq deńgeıge laıyq kontent jasaı alatynyn aıqyn dáleldedi.
Festıvaldiń jabylý rásimi de erekshe áserge toly ótti. Qatysýshylardyń tolqynysy, shynaıy emosııalar jáne jeńimpazdardy jarııalaý sáti este qalarlyq boldy. Uıymdastyrýshylar árbir joǵary oqý orny stýdenttik shyǵarmashylyqty damytýǵa ózindik úles qosqanyn, al oryndaý deńgeıiniń óte joǵary bolǵanyn atap ótti.
Halyq horeografııasy atalymynda Qaraǵandy medısına ýnıversıtetiniń «Qarakóz» shyǵys halyq bıi ansambli 1 oryn alsa, Zamanaýı horeografııa boıynsha Qaraǵandy medısına ýnıversıtetiniń «New Wave» zamanaýı bı stýdııasy jeńimpaz atandy.
Aspaptyq oryndaýshylyq (solo) boıynsha Ábilqas Saǵynov atyndaǵy Qaraǵandy tehnıkalyq ýnıversıteti stýdenti Arman Kákim, Aspaptyq oryndaýshylyq (ansambl) boıynsha Qaraǵandy medısına ýnıversıteti «Zhiger» qazaq ulttyq aspaptar ansambli, Halyq vokaly boıynsha «Bolashaq» akademııasy stýdenti Aıymjan Maralqyzy, Estradalyq vokal boıynsha E.A. Bóketov atyndaǵy Qaraǵandy ulttyq zertteý ýnıversıteti stýdenti Ansat Smanov, Konferanse boıynsha Qaraǵandy medısına ýnıversıteti stýdentteri Shapaǵat Qurmanǵazy men Saparhan Ábdiǵalı, «StopNarkomanııa» beınerolıkteri boıynsha Qaztutynýodaǵy Qaraǵandy ýnıversıteti Kreatıvti stýdentter lıgasy top jardy.
Qatysýshylar júldeler men dıplomdardan bólek, baǵa jetpes sahnalyq tájirıbe, jańa tanystyqtar men aldaǵy jetistikterge motıvasııa aldy.
Uıymdastyrýshylar, seriktester men oqytýshylar festıvaldi joǵary deńgeıde ótkizýge qosqan úlesi úshin alǵysqa ıe boldy, al qala turǵyndary is-sharanyń aýqymy men sapasyn joǵary baǵalady.
