Foto: Ashyq derekkóz
Memleket basshysy óz sózinde Hırosıma, Nagasakı jáne Semeı qasireti ıadrolyq qarýǵa jaýapkershilikpen qarap, ustamdylyq tanytýdyń qanshalyqty mańyzdy ekenin aıtty.
«Qazaqstan táýelsizdik alǵannan keıin Semeı ıadrolyq polıgonyn jabý jáne álemdegi tórtinshi ıadrolyq arsenaldan bas tartý týraly tarıhı sheshim qabyldady. Bul bizdiń osaldyǵymyz emes. Kerisinshe, strategııalyq kóregendik tanytyp, osy arqyly beıbitshilik pen adamzat qaýipsizdigi mańyzdy ekenin kórsettik. Arada otyz jyldan asa ýaqyt ótse de, osy ustanymnan aınyǵan joqpyz: jahandyq qaýipsizdik júıesin ıadrolyq qarýmen ustap turýǵa bolmaıdy. Halyqaralyq qoǵamdastyq jappaı ıadrolyq qarýsyzdaný baǵytynda belsendi áreket etip, Iаdrolyq synaqtarǵa jan-jaqty tyıym salý týraly sharttyń kúshine enýine úles qosýǵa tıis. Qazaqstan jappaı qyryp-joıatyn qarýy bar alpaýyt elder arasyndaǵy joǵary deńgeıli dıalogty qaıta bastaýǵa úndeıdi. Sondaı-aq ıadrolyq qarýdy qoldaný nemese synaý qaýpin joıý úshin anaǵurlym batyl ári kópjaqty áreketke shaqyrady. Qazaqstan men Japonııanyń bul turǵyda álem aldynda júzi jarqyn. Elderimiz ıadrolyq alpaýyt memleketter mámilege kele almaı jatqan kezde qarama-qaıshylyqtardy rettep, pragmatıkalyq turǵydan kóshbasshy ekenin kórsete alar edi», dedi Prezıdent.
Sonymen qatar Qasym-Jomart Toqaev BUU ýnıversıteti JI salasyndaǵy halyqaralyq zertteýlerdi ilgeriletýde biregeı múmkindikke ıe ekenin aıtty.
Memleket basshysy Qazaqstannyń BUU aıasynda Halyqaralyq sý uıymyn qurý týraly bastama kótergenin eske saldy. Sondaı-aq BUU ýnıversıtetine osy izgi isti qoldap, ǵylymı zertteýlerge belsendi atsalysýdy usyndy.
Keleshek týraly oı qozǵaǵan Qasym-Jomart Toqaev jasandy ıntellektini qazirgi zaman kelbetin qalyptastyratyn sheshýshi kúshtiń biri dep atady.
Áıtse de, onyń pikirinshe, JI-diń qaýpi de joq emes. Oǵan jurtshylyqtyń teńdeı qol jetkize almaýy jáne teris pıǵylda, sonyń ishinde áskerı maqsatta qoldanýy sebep bolýy yqtımal.
«Birikken Ulttar Uıymy kezinde ıadrolyq qaýipsizdik pen azamattyq avıasııa salalarynda jalpyǵa birdeı normalardy qalyptastyrdy. Sol sekildi endi bul iste de negizgi úılestirýshi rólin atqarýǵa tıis. Álemniń jetekshi tehnologııalyq ortalyqtarynyń birinde ornalasqan jahandyq oqý orny retinde BUU ýnıversıteti JI-diń áleýetine, qaýip-qaterine jáne ony basqarýǵa qatysty halyqaralyq zertteýlerdi ilgeriletýde biregeı múmkindikke ıe», dedi Prezıdent.Aıta keteıik Memleket basshysy Tokıo qalasyndaǵy Birikken Ulttar Uıymy ýnıversıtetine baryp, «Dúrbeleńge toly dáýirdegi strategııalyq senimdi qalpyna keltirý: ádiletti ári turaqty álem qurý jolyndaǵy Qazaqstannyń ustanymy» taqyrybynda dáris oqydy.
