«Isker aımaq» jobasy shaǵyn kásipkerlik salasyn qoldaıtyn basty qujat bolǵaly tur. Ulttyq ekonomıka mınıstrliginiń habarlaýynsha, qaýly jobasynda kásipkerlerge qarjylaı kómek nesıelerin berýden bastap, ınfraqurylymdy damytý, bıznes ókilderin oqytý, olardyń jobalaryn qoldaýǵa deıingi barlyq is-shara qamtylǵan.
Qujatta shaǵyn bıznes sýbektilerine qarjylaı kómek paıyzdyq mólsherlemeniń bir bóligin sýbsıdııalaý jáne qaryzdarǵa kepildik berý arqyly beriletini aıtylǵan. Bul sharalar qaryz qarajattarynyń qunyn tómendetýge, nesıe resýrstaryna jeńil qol jetkizýge múmkindik bermek.
Baǵdarlama iske qosylsa, shaǵyn kásip ıeleri ınfraqurylym máselesin de ońaı sheship, qajetti úı-jaılary men jer ýchaskelerin alý jaǵynan memlekettiń qoldaýyna arqa súıeı alady. «Jergilikti atqarýshy organdar men «Atameken» UKP óńirlik mamandanýdy eskere otyryp, qyzmet túrlerin aıqyndaıdy, kásipkerlerdiń ótinimderin qaraıdy ári bekitedi, nátıjelerge monıtorıng júrgize otyryp, ınfraqurylymdyq qoldaý kórsetedi», delingen mınıstrliktiń bizge bergen aqparatynda.
Jobada kásipkerlikti damytý maqsatynda ortaq jaýapkershilikke tartylatyn óńirlerge basymdyq beriledi. Ol úshin jergilikti atqarýshy organdar ózderiniń áleýmettik-ekonomıkalyq áleýetin, ózekti qajettilikterdi eskere otyryp, kerekti taýarlardyń tizbesin jasaýǵa tıis.
Baǵdarlamada óńirlik ekonomıkanyń ereksheligin eskeretin kredıttik lımıtterdiń eki deńgeıli júıesi de qarastyrylǵan.
Birinshi deńgeı óńirlik mamandanýǵa sáıkes keletin, halyqtyń ómir súrý sapasyn arttyrýǵa baǵyttalǵan jobalardy qamtıdy, ıaǵnı aýyl sharýashylyǵy ónimderin qaıta óńdeý, azyq-túlik shaǵyn óndiristeri, naýbaıhanalar, aǵash óńdeý jáne aýyl, aýdan ortalyqtaryndaǵy qolóner jobalaryna erekshe kóńil bólinip, bul salalarǵa sýbsıdııalar bıýdjetiniń 70%-na deıin bólinedi.
Ekinshi deńgeı turaqty óndiristik bazany qalyptastyrýǵa, jumyspen qamtýdy keńeıtýge, óńirlerde uzaqmerzimdi ekonomıkalyq tıimdilikti qurýǵa arnalǵan. Bul deńgeıdegi jobalarǵa tamaq óndirisi, jıhaz sehtary jáne qurylys materıaldaryn óndirý jatady, oǵan sýbsıdııalar bıýdjetiniń 30%-na deıin bólý kózdelgen.
«Abaı, Ulytaý, Jetisý, Soltústik Qazaqstan, Qyzylorda oblystaryndaǵy ónerkásiptik jobalarǵa erekshe nazar aýdaryldy. Baǵdarlama barlyq aýyldyq aımaqty qamtıdy, ondaǵy shaǵyn jáne orta bıznes jobalaryn qoldaıdy», deıdi mınıstrlik ókilderi.
Baǵdarlamany ázirleýshiler «Isker aımaq» búkil eldegi shaǵyn bıznesti damytýdyń jańa biryńǵaı tásili bolatynyna senimdi. Jobada ásirese, aýyldyq jerdegi shaǵyn kásip ıelerin qoldaýǵa basymdyq beriledi. Mınıstrliktiń habarlaýynsha, baǵdarlamany qabyldaý – aýyldyq eldi mekender men shaǵyn qalalardaǵy bıznesti aýqymdy damytýdyń mańyzdy qadamy.
«Isker aımaq» iske kirisse, bylǵary, sút, qolóner men basqa da basym salalardyń damýyna nazar aýdarylyp, shıkizatty jergilikti óndirý ári qaıta óńdeýdi yntalandyrýǵa múmkindik beriledi.
