«Ortalyq Azııada qýatty agroónerkásip kesheni burynnan bar. Sondyqtan aımaq jahandyq azyq-túlik qaýipsizdigin qamtamasyz etý isinde mańyzdy ról atqara alady.
Qazaqstan Japonııanyń resýrs únemdeý tehnologııasyna, shólge tózimdi daqyldar seleksııasyna, «aqyldy» fermalardy damytý tájirıbesine qyzyǵýshylyq tanytady.
Osy oraıda ornyqty aýyl sharýashylyǵy salasynda japon ǵalymdarynyń jáne sarapshylarynyń qatysýymen Zertteý platformasyn qurýdy usynamyz.
Astanada qoldanbaly ǵylymdar salasynda ǵalymdar men zertteýshilerdiń alǵashqy kezdesýin «Ortalyq Azııa – Japonııa» formatynda uıymdastyrýdy usynamyn», dedi Qasym-Jomart Toqaev.
Ol Qazaqstannyń JICA agenttiginiń Ortalyq Azııadaǵy kúrdeli sý problemasyn sheshýge qosqan úlesin baǵalaıtynyn eske saldy.
«Aýyl sharýashylyǵynyń damýy sý qaýipsizdigimen tikeleı baılanysty.
Ortalyq Azııa qazirdiń ózinde sý tapshylyǵyn sezinip otyr. Sońǵy jıyrma jylda óńirde jan basyna shaqqanda sýmen qamtý kólemi shamamen 30 paıyzǵa tómendedi. Onyń ústine sý resýrstarynyń 70 paıyzǵa jýyǵy – transshekaralyq.
Kaspıı teńiziniń tartylýy alańdaýshylyq týǵyzady, al Aral ekologııalyq apaty sý resýrstaryn retsiz paıdalanýdyń saldary qandaı qaıǵyly bolatynyn kórsetti.
Qazaqstan Japonııa halyqaralyq yntymaqtastyq agenttiginiń (JICA) Ortalyq Azııadaǵy kúrdeli sý problemasyn sheshýge qosqan úlesin baǵalaıdy ári atalǵan bedeldi ınstıtýtpen yqpaldastyqty jalǵastyrýǵa nıetti», dedi Prezıdent.
Memleket basshysy Japonııanyń sý salasyn avtomattandyrý jáne sıfrlandyrý tájirıbesine erekshe qyzyǵýshylyq tanytty.
«Sý únemdeýdiń ozyq tehnologııalaryn almasý, ortaq ǵylymı-zertteý jumystaryn júrgizý jáne Jerdi qashyqtan zondtaý sekildi asa mańyzdy sharalar qamtylatyn Birlesken sý sharýashylyǵyn damytý baǵdarlamasyn ázirleýge bolar edi.
Qazaqstan BUU aıasynda jańadan UN Water halyqaralyq uıymyn qurýdy usyndy. Bul sý problematıkasymen aınalysatyn basqa da qurylymdardyń kúsh-jigerin bir arnaǵa toǵystyrady.
Japondyq saıasatkerler men qoǵam qaıratkerlerin, kásipkerler men sarapshylardy kelesi jyly sáýir aıynda Astanada ótetin О́ńirlik ekologııalyq sammıtke qatysýǵa shaqyramyz», dedi Qazaqstan basshysy.
