Foto: https://www.aa.com.tr/ru
Ushaq radardan joǵalyp, baılanys úzilgen
Túrkııanyń Ishki ister mınıstri Alı Erlıkaıanyń málimetinshe, 9H-DFJ borttyq nómirli Falcon 50 ushaǵy Ankara áýejaıynan 20:10-de Lıvııa astanasy Trıpolıge baǵyt alǵan. Ushý kezinde ekıpaj Haımana aýdany mańynda shuǵyl qonýǵa suranys bildirip, kóp uzamaı baılanysqa shyqpaı qalǵan. Saǵat 20:52-de ushaqpen baılanys tolyq úzilgen.
Keıin jandarmerııa bólimsheleri áýe kemesiniń qaldyqtaryn Haımana aýdanyndaǵy Kesıkkavak aýylynan ońtústikke qaraı 2 shaqyrym jerden tapqan.
Bortta 8 adam bolǵan
Apat kezinde ushaqta 8 adam, onyń ishinde Lıvııa Bas shtabynyń bastyǵy Mohammed Alı Ahmed Al-Haddad bolǵan. Ol sol kúni Ankaraǵa resmı saparmen barǵan.
Lıvııa premer-mınıstri Abdel Hamıd Dbeıba Al-Haddadtyń qaza tapqanyn rastady. Onyń aıtýynsha, ushaqta sondaı-aq Lıvııa qurlyq áskerleriniń qolbasshysy, áskerı óndiris basqarmasynyń dırektory, Bas shtab bastyǵynyń keńesshisi men fotografy, 3 ekıpaj múshesi bolǵan. Barlyǵy qaza tapqandar qatarynda dep eseptelip otyr.
Aldyn ala sebep jáne tergeý
Aldyn ala málimetterge sáıkes, apatqa tehnıkalyq aqaý sebep bolýy múmkin. Qazir oqıǵanyń mán-jaıyn anyqtaý úshin tergeý júrgizilip, izdestirý-qutqarý jumystary jalǵasyp jatyr.
Lıvııada aza tutý jarııalandy
Osy qaıǵyly oqıǵaǵa baılanysty Lıvııa úkimeti 3 kúnge sozylatyn resmı aza tutý kúnderin jarııalady. Aıta ketelik, 24-25 jeltoqsan kúnderi elde Táýelsizdik kúnine arnalǵan merekelik is-sharalar ótpek bolǵan.
