Foto: Akorda.kz
Erlan Qarın Prezıdent Qasym-Jomart Toqaev qoǵamda eńbek kýltin ornyqtyrý, jumysshy mamandyqtarynyń mártebesin arttyrý saıasatyn júıeli túrde júrgizip otyrǵanyn atap ótti.
«Memleket basshysy bıyl kásibı merekeler aıasynda energetıkterdi, qutqarýshylardy, muǵalimderdi, munaıshylardy, dárigerlerdi, sý sharýashylyǵy salasynyń qyzmetkerlerin, aýyl sharýashylyǵy mamandaryn Aqordada arnaıy qabyldap, qurmet kórsetti. Jalpy, osy jyly Prezıdent Jarlyǵymen 1300-ge jýyq jumysshy mamandyqtar ókili memlekettik marapatqa ıe boldy. Osynyń barlyǵy eseli eńbekti qadirleýge baǵyttalǵan mańyzdy qadamdar. Bul – eńbek adamy memlekettik saıasattyń basty nazarynda degen sóz», dedi Memlekettik keńesshi.
Erlan Qarın eńbekti qadirleý, urpaqtar sabaqtastyǵyn saqtaý, jumysshy jastardy qoldaý memlekettik saıasattyń basym baǵyty bolyp qala beretinin aıtty.
«Jumysshy mamandyqtary jyly bizdiń qoǵam eńbekti erekshe qadirleıtinin kórsetti. Halyq arasynda elge naqty paıda ákeletin adamdar qurmetti, syıly ekenin baıqatty. Kásibı mamandardy dáripteý aldaǵy ýaqytta da úzdiksiz jalǵasa bermek», dedi Memlekettik keńesshi.
Is-shara barysynda jumysshy mamandyqtarynyń úzdik ókilderi memlekettik nagradalarmen marapattaldy.
Sonymen qatar respýblıkalyq «Eńbek joly» baıqaýynyń «Úzdik eńbek áýleti», «Jumysshy jastardyń úzdik tálimgeri», «О́ndiristegi úzdik jas qyzmetker» atalymdarynda top jarǵan azamattarǵa qurmet kórsetildi. Oǵan qosa «Erlik pen eńbek dastany» baıqaýynyń jeńimpazdary, jumysshy jastardyń áleýetin qoldap, damytý maqsatynda júzege asyrylyp jatqan «Jumysshy jastar amanaty» jobasynyń qatysýshylary qurmetke bólendi.
Jıynǵa qatysýshylar memleket tarapynan qabyldanyp jatqan sharalar qoǵamdaǵy eńbek adamynyń rólin arttyrýǵa yqpal etip, jumysshy mamandyqtaryn keńinen nasıhattaýǵa sony serpin bergenin aıtty. Jumysshy mamandyqtary jylynyń qorytyndysyna arnalǵan saltanatty rásim elimizdiń damýyna kúndelikti adal eńbegimen úlken úles qosyp júrgen jandardyń kásibıligi men jaýapkershiligine kórsetilgen laıyqty qurmettiń taǵy bir dáleli boldy.
