Ulytaý oblysynda buqaralyq sportty damytýǵa kóńil bólinip keledi. Jyl basynda Jezqazǵanda 320 oryndyq «Jiger» sport kesheni men Shahmat akademııasy paıdalanýǵa berildi. Qarajal qalasynda jabyq júzý basseıni iske qosyldy. Sátbaev qalasynda angar úlgisindegi sport kesheni ashyldy. Qarajal qalasyndaǵy «Gornıak» stadıonyna kúrdeli jóndeý júrgizilip, tórt balalar men jasóspirimder sport mektebi jańǵyrtýdan ótti.
Saltanatty sharada Ulytaý oblysynyń ákimi Dastan Ryspekov sala qyzmetkerleri men jattyqtyrýshylardy kásibı jetistikterimen quttyqtap, sportshylardyń jeńisti jetistigine toqtaldy.
Bokstan álem kýbogynyń júldegeri Aıdana Zabynbekova, qazaq kúresinen eki dúrkin álem chempıony Aıdos Ǵalymov ulttyq sportty halyqaralyq deńgeıde ózgelerge moıyndatty. Jasóspirimder arasyndaǵy Azııa oıyndarynyń qola júldegeri, aýyr atlet Nursyıla Berikbol, jaýyngerlik sambodan álem chempıondary Dinmuhamed Dinıslamov pen Abylaıhan Alshymbek oblys mereıin respýblıka kóleminde asqaqtatty. Para dzıýdo boıynsha halyqaralyq jarysta el namysyn asqaqtatqan Daıana Fedosovanyń esiminde erekshe atap ótken jón.
Bul jetistikterdiń barlyǵy – sportshylardyń, jattyqtyrýshylardyń jáne sala mamandarynyń júıeli ári tabandy eńbeginiń nátıjesi.
«Oblysymyzda jańa sport nysandary salynyp, qoldanystaǵy keshender jańǵyrtylyp, halyqtyń sportpen turaqty túrde aınalysýyna múmkindik jasalýda. Bıyl alǵash ret sport nysandaryn jóndeý jumystaryna 578 mıllıon teńge bólindi. Bul ótken jylmen salystyrǵanda 9 esege kóp. Aldaǵy ýaqytta da bul baǵyttaǵy jumystar jalǵasyn tabady», dedi oblys ákimi.
Saltanatty jıynda «Úzdik balalar men jasóspirimder sport mektebi», «Úzdik dene shynyqtyrý jáne sport bólimi», «Úzdik jattyqtyrýshy», «Úzdik sportshy» atalymdar boıynsha sala úzdikteri marapattaldy. Sonymen qatar, óńirde buqaralyq sportty keńinen nasıhattap, salaýatty ómir saltyn dáripteýge úles qosqan jýrnalısterdiń eńbegi elendi.
Ulytaý oblysy
