Almaty qalasy Almaly aýdanynyń Qorǵanys isteri jónindegi basqarmasynyń áskerı qyzmetshileri qarııanyń shańyraǵyna arnaıy baryp, týǵan kúnimen quttyqtady. Olar maıdangerge Qorǵanys mınıstriniń quttyqtaý haty men syılyq tabys etti.
«Soǵys ardagerleri erekshe nazar men qurmetke laıyq. Olardyń bizdiń ıgiligimiz úshin jasaǵan eńbegin baǵalap, alǵys bildirý óte mańyzdy», dedi Almaly aýdany Qorǵanys isteri jónindegi basqarmanyń top bastyǵy, kapıtan Gúlsim Bákirova.
Egde tartqanyna qaramastan, ardager qonaqtardy jaqsy kóńil kúımen qarsy alyp, soǵys jyldarynan estelikter aıtty.
Vasılıı Fomıch 1923 jyly 23 jeltoqsanda Altaı ólkesiniń Karpovo aýylynda dúnıege kelgen. Kishi avıasııa mamandaryn daıarlaıtyn mektepte oqyp, áýe atqyshy jáne radıst mamandyqtaryn meńgergen. Jaýyngerlik jolyn 1944 jyly sáýirde bastaǵan. Ol kezde jasy nebári 21-de edi. Jas sarbaz Prımorsk derbes armııasynyń barlaý polkine jiberilip, keıin III Belarýs maıdany radıotorabynyń bastyǵy bolyp taǵaıyndalǵan.
Vasılıı Shıpılev áskerı qyzmet jolynda I dárejeli «Otan soǵysy» ordenimen, «Jaýyngerlik erligi úshin», «Kenıgsbergti alǵany úshin», «Germanııany jeńgeni úshin», basqa da medaldarmen marapattaldy. Soǵystan keıin de áskerı qyzmetin jalǵastyryp, 1950 jyly zapasqa shyqqan.
Odan soń burǵylaý qondyrǵysynda jumysshy, keıin sheber bolyp jumys istegen. Makaron fabrıkasynda barlyq mamandyqty meńgerip, VI dárejeli slesar atandy. Osy jerde ol áıeli Valentınany kezdestirip, otaý qurdy. Ekeýi 62 jyl birge ómir súrip, Rımma, Olga jáne Irına atty úsh qyzdy dúnıege ákeldi. Olardan alty nemere men shóbereleri bar.
