«Men búgin Tarazda jańadan ashylǵan áskerı mektep-ınternatqa bardym. Bul – ońtústik aımaqtarda ashylǵan osyndaı alǵashqy oqý orny. Men mektep-ınternatqa osy ólkeniń týmasy, áıgili batyrymyz Baýyrjan Momyshulynyń esimin berýdi usynamyn. Osyndaı Baýyrjan mektepteri barlyq aımaqta ashylýy kerek. Úkimet bul máseleni pysyqtaıdy. Biz jas urpaqqa sapaly bilim berip, olardy otanshyldyqqa tárbıeleýimiz qajet», dedi Qasym-Jomart Toqaev.
Aıta keteıik, kúni keshe dańqty qolbasshy Baýyrjan Momyshulynyń týǵanyna 115 jyl toldy. Dese de búginge deıin batyrǵa resmı túrde «Halyq qaharmany» ataǵy berilmegen edi. Búgin Prezıdent jambyldyqtarmen kezdesýinde Baýyrjan Momyshulyna «Halyq qaharmany» ataǵy resmı túrde berilgenin jáne tıisti Jarlyqqa qol qoıǵanyn málimdedi.
Eske salaıyq, Qarýly kúshterdiń áskerı avıasııalyq bazalarynda qazaqtyń uly perzenti, Keńes Odaǵynyń Batyry Baýyrjan Momyshulynyń týǵanyna 115 jyl tolýyna oraı aýqymdy oqý-jattyǵý ushýlary ótti.
Qazir Ulttyq ulan qatarynda Baýyrjan esimdi 249 áskerı qyzmetshi Otan aldyndaǵy boryshyn ótep júr.
