Apatty tergep-tekserý jumysynyń komıssııasyna Ázerbaıjan, Reseı, Brazılııa ýákiletti ókil bolyp, Halyqaralyq azamattyq avıasııa uıymynyń (IKAO) baqylaýshysy múshelik etip otyr.
Oqıǵaǵa qatysty aldyn ala tergeý qorytyndysy buǵan deıin 4 aqpan kúni jarııalanǵan.
Tergeý barysynda áýe dıspetcherleriniń, ushýǵa daıyndyq, ony oryndaýǵa arnalǵan qujattar men meteorologııalyq aqparat pen tehnıkalyq qyzmet kórsetý materıaldary taldanǵan. Sondaı-aq ushý derekterin tirkeıtin qurylǵy men ózge de mańyzdy qyzmetterdiń oryndalý barysyna qatysty málimet alynǵan.
«Tergeý kezinde anyqtalǵan bógde metall zattarǵa (syrtqy obektiler) keshendi (trasologııalyq, ballıstıkalyq, jarylys-tehnıkalyq jáne órt) saraptama júrgizildi. Saraptama nátıjeleri boıynsha jarylǵysh zattardyń izderi tabylǵan. Zertteýge usynylǵan úsh ottegi ballonynda jarylys izderi joq. №2 gıdravlıkalyq júıe tútiginiń bir bóligine trasologııalyq saraptama júrgizildi. Zertteý nátıjeleri boıynsha tútikte zaqym bar ekendigi anyqtaldy», delingen Kólik mınıstrliginiń habarlamasynda.
Apatqa áskerı qaqtyǵys áreketteri sebep boldy ma?
Komıssııanyń ekinshi toby qaqtyǵys aımaǵynan ushý kezindegi táýekelderdi zertteýge den qoıǵan. Búginde komıssııa Reseı jáne Ázerbaıjan avıasıalyq bıligi, «Azerbaijan Airlines» áýekompanııasy usynǵan yqtımal boljamdarǵa taldaý júrgizip jatyr. Mınıstrlik málimetinshe, tergeýdiń osy bóliginde ushý qaýipsizdigin qamtamasyz etý kezinde azamattyq jáne áskerı sektorlardyń ózara is-qımyly máseleleri de qarastyrylyp jatyr.
«Qazir tergep-tekserý jónindegi komıssııa tehnıkalyq qyzmet kórsetýdiń ortalyq kompıýteriniń (Central Maintenance Computer) kassetasyn zertteý jumystarynyń aıaqtalýyn, sondaı-aq qaqtyǵys aımaqtarynyń ústinen nemese olardyń mańynda ushýdy oryndaý kezindegi táýekelderdi baǵalaý taldaýy boıynsha jumys tobynyń esebin kútip otyr», delingen mınıstrliktiń aldyn ala tekserý nátıjeleri jarııalanǵan qujatta.
Qaıǵyly oqıǵadan keıin Memleket basshysy Qasym-Jomart Toqaev Qazaqstan ushaq apatyn zertteýge bar kúsh-jigerin salatynyn málimdegen.
Eske salaıyq, qaza tapqandardyń arasynda 3 ekıpaj múshesi bolǵan. Apattan aman qalǵan azamattar jergilikti aýrýhanada em aldy.
Elimizdiń quzyrly organdary apattan qaza tapqan ózge shetel azamattarynyń máıitin eline jetkizý isine belsendi qatysty.
Prezıdent ushaq apaty kezinde kómektesken árbir janǵa alǵys aıtyp, 10 qutqarýshyǵa memlekettik nagrada tabystalǵan bolatyn.
