Foto: Instagram/f.c.kairat
Konkýrstyq komıssııa sheshimimen «Jyldyń úzdik sportshysy» atalymy boıynsha áıelder boksynan eki dúrkin álem chempıony jáne Álem kýboginiń kúmis júldegeri Alýa Balqybekova, sondaı-aq grek-rım kúresinen bıylǵy álem chempıony, Azııa chempıony, Qazaqstannyń eńbek sińirgen sport sheberi Aıdos Sultanǵalı úzdik dep tanyldy.
Al «Jyldyń úzdik jattyqtyrýshysy» atalymynda Alýa Balqybekovanyń jeke jattyqtyrýshysy Dolkýnjan Kamekov pen Aıdos Sultanǵalıdi daıyndaǵan Raıymbek Ǵabıden laýreat atandy.
Qazaqstan boks federasııasy «Jyldyń úzdik akkredıttelgen sport federasııasy» ataǵyna ıe boldy. Federasııa ulttyq quramanyń 2025 jylǵy álem chempıonatyndaǵy joǵary nátıjeleri men sportshylardy júıeli túrde qoldaǵany úshin marapattaldy.
Sondaı-aq Almaty oblysynyń dene shynyqtyrý jáne sport basqarmasy «Ulttyq jáne at sporty túrleri boıynsha sportty damytý dıreksııasy» «Jyldyń úzdik sport uıymy» atandy. Jyl qorytyndysy boıynsha uıym 12 ulttyq jáne at sporty túri boıynsha 837 sportshyny daıyndap, 53 resmı jarysta 85 medal jeńip alǵan. Onyń 28-i – altyn.
Temirlan Anarbekov Eýropaǵa kete me? Qazaq qaqpashysynyń qaı lıgada oınaǵany jón?
«Jyldyń úzdik sport óńiri» atalymy boıynsha Qyzylorda oblysy jeńimpaz dep tanyldy. Qazirgi tańda óńirde 377 myń adam, ıaǵnı turǵyndardyń 44,6 paıyzy sportpen júıeli túrde aınalysady. Keıingi jyldary oblysta sport ınfraqurylymy qarqyndy damyp, óńir sportshylary respýblıkalyq jáne halyqaralyq jarystarda joǵary nátıjelerge qol jetkizip júr.
«Aýyldyq jerdegi úzdik dene shynyqtyrý jáne sport nusqaýshysy» atalymy Jambyl oblysy T.Rysqulov aýdany Qumaryq aýyldyq okrýginiń sport nusqaýshysy Serjan Badenovke buıyrdy. Ol buqaralyq sportty damytýǵa, jarystar uıymdastyrýǵa jáne aýyl jastaryn júıeli túrde sportqa tartýǵa eleýli úles qosqan.
«Aýdandyq úzdik dene shynyqtyrý jáne sport bólimi» atalymynda Qaraǵandy oblysy Qarqaraly aýdanynyń dene shynyqtyrý jáne sport bólimi úzdik dep tanyldy. Qarqaraly aýdanynda respýblıkalyq jáne oblystyq deńgeıdegi sporttyq is-sharalar júıeli túrde ótkizilip, sportpen turaqty aınalysatyn turǵyndardyń úlesi 41,3 paıyzǵa jetken.
«Jyldyń úzdik aýyl jattyqtyrýshysy» atalymynda Qostanaı oblysy Beıimbet Maılın aýdanynyń balalar-jasóspirimder sport mektebiniń shańǵy jarysy jattyqtyrýshysy Vladımır Shalygın jeńimpaz atandy. Ol sportshylardy ulttyq jáne oblystyq quramalarǵa, sondaı-aq Qazaqstan chempıonattarynyń jeńimpazdary men júldegerlerine daıyndaǵan.
«Dene shynyqtyrý jáne sport salasynyń úzdik mamany» marapaty Astana qalasynyń «Sportty damytý dıreksııasy» RMK ınspektorlyq-analıtıkalyq bóliminiń ádiskeri Meıram Nurtazınge tabystaldy. Ol halyqaralyq jarystarda, sonyń ishinde Azııa oıyndarynda kórsetken analıtıkalyq qoldaýy úshin úzdik dep tanyldy.
«Jyldyń úzdik balalar jattyqtyrýshysy» atalymy jasóspirimder arasyndaǵy (U17) álem chempıony Madhııa Ýsmanovany daıyndaǵan Hıslat Mammetovke berildi.
«Aýyldyq jerdegi úzdik dene shynyqtyrý jáne sport ádiskeri» atalymymen Aqtóbe oblysy Yrǵyz aýdanyndaǵy balalar men jasóspirimder sport mektebinde qyzmet etetin Altynbek Sarbýpın marapattaldy. Ol kúres túrin damytýǵa jáne ádistemelik jumysqa kóp jyldyq úles qosqan.
«Sporttaǵy jyl serpini» atalymy «Qaırat» fýtbol klýbynyń oıynshysy Dastan Sátpaevqa tabystaldy.
«Jasóspirimder jáne jastar quramasynyń sportshysy» atalymynda kórkem gımnastıkadan Qazaqstannyń absolıýtti chempıony, Azııa jáne álem chempıony Aqmaral Erekeshova, frıstaıl-akrobatıkadan álem chempıony Dinmuhammed Raımqulov jáne aýyr atletıkadan álem chempıony Ksenııa Prozorova laýreat atandy.
2025 jyly Qazaqstan sportshylary qandaı jetistikterge qol jetkizdi?
«Jyldyń úzdik sport mesenaty» atalymy FREEDOM kompanııasyna berildi.
Sonymen qatar Seıdahmet Berdiqulov atyndaǵy «Úzdik sport jýrnalısi» baıqaýynyń jeńimpazdary anyqtaldy.
«Úzdik telejoba» atalymymen Qazsport telearnasynyń bas redaktory Azat Smaǵulov marapattalsa, «Úzdik sporttyq jarııalanym» atalymy boıynsha Qanat Baıuzaqov (Elordainfo.kz) pen Ásel Ábilbek (Baq.kz) úzdik dep tanyldy. Al «Úzdik fotoreportaj» atalymy Turar Qazanǵapqa buıyrdy.
