Foto: Ashyq derekkóz
Sot sheshimimen aıyptalýshyǵa 200 saǵat qoǵamdyq jumys jazasy taǵaıyndaldy.
Sotta anyqtalǵandaı, 5 qyrkúıek kúni azamat K. jábirlenýshiniń úıine kelip, kireberis esikti julqylap, terezeni qaqqannan keıin oqıǵa ornynan ketip qalǵan. Keıin áıeldiń qozǵalysyn baqylaý maqsatynda ol «2GIS» qosymshasy arqyly jábirlenýshiniń kámeletke tolmaǵan balalarynyń telefon nómirlerine «dostyq» suraýyn jiberip, ulynyń júrgen jerin baqylaýǵa múmkindik alǵan.
Eki aptadan soń mas kúıde aıyptalýshy jábirlenýshiniń úıine qaıta kelip, ashyq turǵan aýlaǵa kirip, terezelerge úńilgen. Bul áreketter jábirlenýshiniń erkinen tys jasalǵan jáne kúsh qoldanýsyz júzege asqan.
Alǵashynda polısııa bul oqıǵa boıynsha Ákimshilik quqyq buzýshylyq týraly kodekstiń 434-baby («Usaq buzaqylyq») boıynsha hattama toltyryp, sot 60 saǵat qoǵamdyq jumys jazasyn taǵaıyndaǵan. Alaıda jábirlenýshi tarap qosymsha dálelder usynǵannan keıin is qylmystyq is retinde qaıta tirkelgen.
Qylmystyq proseste prokýror aıyptalýshyǵa 200 saǵat qoǵamdyq jumys jazasyn taǵaıyndaýdy surady. Jábirlenýshi neǵurlym qatań jaza qoldanýdy talap etip, moraldyq zııandy óteý týraly azamattyq talap-aryz berdi. Aıyptalýshy óz kinásin ishinara moıyndady.
Sot jábirlenýshi men kýálardyń aıǵaqtary, oqıǵa ornynan alynǵan beınejazbalar jáne ózge de materıaldar negizinde aıyptalýshynyń kinási dáleldendi dep tanydy. Er adamnyń áreketi eleýli zııan keltirgen zańsyz ańdý retinde saralandy.
Nátıjesinde sot azamat K.-ny kináli dep tanyp, 200 saǵat qoǵamdyq jumys jazasyn taǵaıyndady. Sondaı-aq odan jábirlenýshiniń moraldyq zııany úshin 400 myń teńge jáne ókil qyzmetine jumsalǵan shyǵyndy óteý úshin 200 myń teńge óndirildi.
