Sýretterdi túsirgen – Valerıı BÝGAEV
Máselen, Toraıǵyrov kóshesindegi ortalyq qalalyq kitaphanalar júıesinde 270 myńnan astam kitap bar. Al sıfrlyq júıede 85 myńy engizilgen. Búginde aǵash sóreleriniń ornyna 2 myńnan astam kitap syıatyn 16 qozǵalmaly sóre ornatylǵan.
Merdigerlik uıymnyń ókili Aleksandr Soıdyń aıtýynsha, kitaphanada ornatylǵan ózin-ózi basqarý termınaly arqyly kitaphanashynyń kómegine júginbeı-aq, Almaty kitaphana júıesindegi kitaptardy da onlaın oqý múmkindigi bar. Buǵan jańa jabdyqtaǵy RFID-tehnologııanyń engizilýi sebep. Osydan birneshe jyl buryn kitaptardy shtrıh-kod arqyly tirkese, budan bylaı atalǵan ádisti qoldaný arqyly oqyrman tańdaǵan kitabyn úı jaǵdaıynda da oqı alady.
– Kitaphanalardyń mazmundyq áleýetin barynsha arttyryp, balalar men jastardy belsendi tartýdy tapsyrdym. Olar qala turǵyndary úshin tartymdy rýhanı ortalyqqa aınalyp, oqý mádenıeti men bilimge qushtarlyqty qalyptastyratyn mańyzdy keńistik bolýy tıis. Qazirgi ýaqytta suranysqa ıe ádebıetterge qyzyǵýshylyq tanytý kerek. Ásirese qarjylyq saýattylyqty damytý maqsatynda ekonomıka, kásipkerlik baǵytta izdengen abzal. Ol otbasylyq bıýdjetti qadaǵalaýǵa, sondaı-aq alaıaqtarǵa aldanbaýǵa septigin tıgizedi, – deıdi óńir basshysy Asaıyn Baıhanov.
Sondaı-aq oblys ortalyǵyndaǵy Múbárak Jamanbalınov atyndaǵy balalar kitaphanasy da jańartýdan ótti. Munda oqý zaly, májilis zaly jáne balalar bólimderi bar. Jańartylǵan ǵımaratta oqýshylardyń yńǵaıyna qaraı qozǵalmaly jıhazdar men sóreler, jumsaq dıvandar ornatylǵan. Sondaı-aq teatr sabaqtaryna arnalǵan shyny qabyrǵa qurylǵan. Iаǵnı ata-analar balalarynyń daıyndyǵyn óz kózimen kóre alady.
Pavlodar oblysy
