Jańa ókildik «Saryarqa» áleýmettik-kásipkerlik korporasııasy men QazTrade Saýda saıasatyn damytý ortalyǵynyń qatysýymen quryldy. Onyń basty maqsaty – Qytaı Halyq Respýblıkasynan keletin ınvestorlardy jan-jaqty súıemeldeý, Qaraǵandy oblysynyń kásipkerlerine Qytaı naryǵyna shyǵýǵa qoldaý kórsetý, otandyq ónimdi ilgeriletý, sondaı-aq iskerlik baılanystardy nyǵaıtýǵa arnalǵan B2B-kelissózder men kezdesýler uıymdastyrý.
Bul keńseniń ashylýy birlesken jobalardy júzege asyrý barysynda jıi kezdesetin ákimshilik jáne kommýnıkasııalyq kedergilerdi azaıtyp, bıznes úshin qolaıly ári ashyq orta qalyptastyrady dep kútilip jatyr.
– Basty maqsatymyz – Qaraǵandy oblysynyń kásipkerlerine Qytaı naryǵyna shyǵýǵa naqty kómek kórsetý jáne sheteldik ınvestorlardy tartý. Jańa keńsede bizdiń turaqty ókilimiz jumys isteıdi, ol týyndaıtyn barlyq máseleni jedel sheshýmen aınalysady. Tolyq aqparatty Investorlarǵa qyzmet kórsetý ortalyǵynan
+7-702-007-66-61 telefony arqyly alýǵa bolady, – dedi oblystyq ónerkásip jáne kásipkerlik basqarmasynyń basshysy Asqar Ǵazalıev.
Úrimji qalasyndaǵy ókildiktiń ashylýy Qaraǵandy oblysy delegasııasynyń Qytaıǵa jasaǵan jumys saparynyń mańyzdy qorytyndysy boldy. Sapar aıasynda óńir basshylyǵy men bıznes ókilderi Beıjińde, Shyńjań-Uıǵyr avtonomııalyq aýdanyndaǵy Úrimji qalasynda, sondaı-aq Szınan (Shandýn provınsııasy) jáne Tanshan (Hebeı provınsııasy) qalalarynda bolyp, iri ındýstrııalyq jáne logıstıkalyq nysandardy aralady. Sonymen qatar Qytaıdyń bıznes qaýymdastyǵy men memlekettik qurylymdarynyń ókilderimen mazmundy kezdesýler ótkizildi.
Kelissózder nátıjesinde energetıka, mashına jasaý, metallýrgııa, logıstıka, avıasııa jáne ekologııalyq tehnologııalar salalarynda birqatar naqty ýaǵdalastyqtarǵa qol jetkizildi. Sonyń ishinde Úrimji qalasynda Shahtınsk qalasynda jańa jylý elektr ortalyǵyn salý jónindegi energetıkalyq jobany iske asyrý týraly kelisimge qol qoıyldy.
Kólik-logıstıkalyq áleýetti damytý máselesi de nazardan tys qalǵan joq. Taraptar Qaraǵandy men Úrimji arasynda tikeleı áýe qatynasyn – jolaýshylar jáne júk reısterin iske qosý múmkindigin talqylady. Qazir bul bastama belsendi pysyqtaý satysynda. Sonymen qatar Qaraǵandy áýejaıynyń kargo-termınalyn eksporttyq-logıstıkalyq baǵytty damytý maqsatynda tıimdi paıdalaný joldary qarastyryldy.
О́ńirdiń ındýstrııalyq damýyna serpin beretin taǵy bir mańyzdy qujat Szınan qalasynda jasaldy. Munda Sinotruk kompanııasy, «Qaztehna» jáne «Saran Machinery» jaýapkershiligi shekteýli seriktestikteri arasynda Qaraǵandy oblysynda avtokomponentter óndirý jelisin iske qosý, servıstik ortalyq pen óńirlik qosalqy bólshekter qoımasyn qurý jónindegi nıet týraly kelisimge qol qoıyldy.
Al Tanshan qalasynda «Qaragandy Metallurgia Zauyty» JShS men «Saryarqa» arnaıy ekonomıkalyq aımaǵynda kabel zaýytyn salý týraly memorandýmǵa qol qoıyldy. Bul joba óńirdegi ınfraqurylymdyq jáne ónerkásiptik bastamalardy sapaly otandyq ónimmen qamtamasyz etýge baǵyttalǵan.
Sapar barysynda Qaraǵandy men Tanshan qalalary arasynda baýyrlastyq týraly memorandýmǵa qol qoıylýy da erekshe mánge ıe. Bul qujat aldaǵy ýaqytta ekonomıkalyq seriktestikpen qatar bilim berý, mádenı jáne gýmanıtarlyq almasýlarǵa keń jol ashady.
Qaraǵandy oblysy
