Júlgesi jańa jyr keshi

Qalalyq ákimdik qol­da­ýymen Qazaqstan Jazý­shylar odaǵy uıym­dastyrǵan shara úsh alyp aqynnyń ulttyq ádebıettegi orny men rýhanı bıigin búgingi kózqaras turǵysynan zerdeleýge arnaldy. Keshtiń ataýy da aqyndar bolmysynyń kórkem ári dál sıpattamasyna aınalyp, olar­dyń poezııadaǵy daralyq sıpatyn aıqyn kórsetti.

Kesh barysynda Qadyr Myrza Áliniń oı bıigi men fılosofııalyq tereńdigi, ulttyq minezdi, qoǵamdyq sana men adam bolmysyn tereń zerdelegen poezııasy keńinen ashyldy. Tumanbaı Moldaǵalıevtiń qazaq lırıkasyndaǵy sezim keńdigi, mahabbat pen adam janynyń názik qyrlaryn aıryqsha syrshyl­dyq­pen jyrlaǵan týyndylary kó­rermenge erekshe áser syılady. Al Jumeken Nájimedenovtiń tereń oıly, adam jan dúnıesiniń kúr­deli álemine boılaǵan, azamattyq pafosy joǵary, ult taǵdyryna alań­daǵan poezııasy keshtiń rýhanı ózegine aınaldy. Olardyń eń tańdaýly óleńderi oqyldy.

Kór­kemsóz oqý, sahnalyq poe­tıkalyq kompozısııalar, beıne­úzindiler men mýzykalyq súıe­meldeý keshtiń mazmunyn baıyt­ty. Aqyndardyń sózine jazyl­ǵan ánder oryndalyp, poezııa men mýzyka úndestigi qosa jarqyrady.

Keshtiń ashylýynda Almaty qalasy ákiminiń orynbasary Abzal Núkenov pen Qazaqstan Jazýshylar odaǵynyń tóraǵasy Mereke Qulkenov sóz sóılep, qazaq ádebıetiniń uly tulǵalaryn ulyqtaýdyń mańyzyna toqtaldy.

Poetıkalyq kesh – tek mereı­toılyq eske alý sharasy ǵana emes, qazaq poezııasynyń altyn qoryn jańasha zerdelep, ult­tyq ádebıetke degen qurmetti kúsheıtken mazmundy rýhanı basqosý boldy. Úsh birdeı alyp aqynnyń óshpes murasy el jadynda máńgi saqtalatynyn, poezııasy urpaqpen birge jasaı beretinin taǵy bir márte dáleldedi.