«Shynymen de, aıtýly oqıǵalar az bolǵan joq. Kózdi ashyp-jumǵansha bir jyl óte shyqty. Mysaly, ekonomıkamyz 6 paıyzdan astam ósti. Ishki jalpy ónim 300 mıllıard dollar mejesine jetip, jan basyna shaqqanda 15 myń dollardan asty. Bul – elimizben qatar, búkil óńir úshin rekordtyq kórsetkish. Jalpy, oıdaǵydaı jumys isteldi deýge bolady. Biraq, men barlyq memlekettik qyzmetshilerge toqmeıilsip, masaırap otyrýǵa múlde bolmaıtynyn únemi aıtamyn. Shyǵys halyqtary «Tegis joldyń ózinde tosqaýyl bar» deıdi. Biz tynymsyz eńbektenip, tek alǵa umtylýymyz kerek. Onyń ústine, túıini tarqatylmaǵan túıtkilder az emes.
Bul – eń aldymen, ınflıasııa deńgeıiniń joǵary bolýy. Sonyń saldarynan azamattarymyzdyń ál-aýqatyn arttyrýǵa arnalǵan eńbektiń bári tekke ketip jatyr. Bıyl Úkimet pen ákimder memleketimizdiń áleýmettik-ekonomıkalyq tuǵyryn nyǵaıtý úshin kóp jumys isteýi kerek», dedi Memleket basshysy.
Prezıdenttiń aıtýynsha, elimizdiń reformalardy júzege asyrýǵa birjola bet burǵanyn ótken jyldyń basty qorytyndysy deýge bolady.
«Qazaqstan jańǵyrý jolynda qaryshty qadam basyp, barynsha órkenıetti el bola bastady. Qoǵamda óskeleń urpaqtyń jarqyn bolashaǵy úshin túbegeıli ózgeris jasaý asa mańyzdy ekeni týraly naqty túsinik qalyptasty.
AQSh prezıdenti Tramptyń «aqylǵa syıymdy oı» strategııasynyń yqpalymen jahandaný úderisi keıinge ysyryla bastady. Biz de Qazaqstanda ádildik, zań men tártip, eńbekqorlyq sııaqty memleketimizdiń bolashaǵy úshin aıryqsha mańyzdy qaǵıdattarǵa negizdelgen qoǵam quryp jatyrmyz. Uzaq merzimge arnalǵan nátıjege jetý úshin bul jumys jańa jylda eki ese tyń qarqynmen jalǵasyn tabady», deıdi Q.Toqaev.
