Qasym-Jomart Toqaevtyń aıtýynsha, zańsyz aktıvterdi elge qaıtarý jónindegi jumys naqty nátıje bergen. Bas prokýratýra janyndaǵy arnaıy komıtet olıgopolııa ókilderinen iri kólemde qarjy óndirip aldy, al bul qarajat áleýmettik jáne kommýnaldyq nysandar salýǵa baǵyttaldy.
«Zańsyz aktıvterdi elge qaıtarý jónindegi komıtet úlken jumys atqaryp, olıgopolııa ókilderinen 1,3 trıllıon teńgeden astam qarjy óndirip aldy. Sonyń 1 trıllıon teńgeden astamy memleket qazynasyna tústi. Arnaıy memlekettik qordaǵy qarajat esebinen elimizde jalpy quny 482 mıllıard teńge bolatyn 434 áleýmettik jáne kommýnaldyq nysan salynyp jatyr», dedi Prezıdent.
Memleket basshysy bul baǵyttaǵy jumys bir jolǵa qoıylǵanyn, endi ony bir ortalyqtan basqarýdyń qajettiligi joǵyn aıtty. Osyǵan baılanysty ınvestorlardyń quqyǵyn qorǵaýǵa basymdyq berilmek. Onyń sózinshe, kúmán týdyrǵan aktıv ıeleriniń ózi qarjysyn el ishinde ınvestısııa retinde salýǵa múddelilik tanytyp otyr.
«Zańsyz aktıvterdi elge qaıtarý arqyly áleýmettik ádildikti qalpyna keltirý – konıýktýra ne bolmasa jurtqa jaǵý úshin jasalǵan saıası naýqan emes, bul – memlekettiń myzǵymas ustanymy. Áńgime ındýlgensııa nemese ymyralasyp, astyrtyn kelisim jasaý týraly bolyp otyrǵan joq, olaı bolýy múldem múmkin emes», dep naqtylady Qasym-Jomart Toqaev.
Prezıdent Qazaqstan zań ústemdigin qatań ustanatyn memleket retinde ınvestorlarmen ashyq ári adal dıalog júrgizýge daıyn ekenin de atap ótti. Onyń aıtýynsha, aldaǵy ýaqytta da eldiń ınvestısııalyq tartymdylyǵyn arttyrý, iri jobalardy iske asyrý jáne áleýmettik salalarǵa qarjy tartý basty basymdyq bolyp qala beredi.
Buǵan deıin Memleket basshysy jańa salyq reformasyna qatysty el ishinde dúrbeleń týǵyzyp, jurtty dúrliktirýdiń eshqandaı jóni joq ekenin atap ótken edi.
