Foto: Ashyq derekkózden
Qasym-Jomart Toqaev ýran óndirisi boıynsha álemde kósh bastap turǵan eldiń birde-bir atom elektr stansııasyn salmaýy múldem aqylǵa qonbaıtynyn atap ótti.
«Qýat kózderin salý úshin bilikti mamandar kerek. Kapıtal qory shamamen 4,5 trıllıon dollar bolatyn álemdegi eń iri kompanııa – NVIDIA-nyń basshysy jaqynda «kók jaǵalylar», ıaǵnı tehnıkalyq mamandyq ıeleri mýltımıllıonerler qataryna qosylady dep boljam jasady.
Birneshe atom stansııasyn salý – birinshiden, tarıhı olqylyqtyń ornyn toltyrý degen sóz. Sebebi, ýran óndirisi boıynsha álemde kósh bastap turǵan eldiń birde-bir atom elektr stansııasyn salmaýy múldem aqylǵa qonbaıdy. Ekinshiden, bul qadam Qazaqstannyń abyroı-bedelin nyǵaıta túsedi. Biz atom stansııalaryn salý arqyly tehnıkalyq ıntellıgensııanyń jańa býynyn qalyptastyramyz. Tıisinshe, memlekettik saıasattyń túpki mánin ózgertemiz. Osyny qaperden shyǵarmaǵan jón», dedi Memleket basshysy.
Prezıdent suhbatynda aldaǵy bes jyldyń ózinde sırek metaldarǵa suranys bes ese artatynyna, osy rette, Qazaqstan úshin taǵy bir múmkindik ashylatynyna nazar aýdardy.
«Taǵy bir óte mańyzdy taqyryp – jer qoınaýynda sırek kezdesetin metaldar. Bolashaqta ondaı materıaldarǵa degen suranys arta beredi, aldaǵy bes jyldyń ózinde bul suranys eki ese ósedi. Osy rette, Qazaqstan úshin taǵy bir múmkindik ashylady. Elimiz jer qoınaýynda sırek kezdesetin mıneraldar qory boıynsha álemdik kóshbasshylar qataryna qosylýy ábden múmkin. Qazaqstan strategııalyq mańyzy bar osy saladaǵy óz rólin kúsheıtý úshin AQSh, Qytaı, Reseı, Ońtústik Koreıa, Japonııa elderimen jáne Eýropa Odaǵynyń birqatar memleketimen yntymaqtastyǵyn damyta bastady», dedi Qasym-Jomart Toqaev.
Eske salaıyq, búgin Qazaqstan Prezıdenti Qasym-Jomart Toqaev «Turkistan» gazetine keń kólemdi suhbat berdi. Onda Memleket basshysy sarbazdardyń jaraqat alýy men qaza bolýy órkenıetti elge jat úrdis ekenin atap ótti.
Suhbat barysynda Memleket basshysy Parlament tóraǵasy laýazymyna qatysty jáne eks-prezıdenttiń Máskeýge sapary týraly pikir bildirdi.
Qasym-Jomart Toqaev qıt etse Úkimetten kómek suraıtyn, memlekettiń qoldaýyn durys túsinbeıtin kásipkerlerdi synǵa aldy.
