«Halyq býhgalteriniń» maqsaty – jeke kásipkerler men shaǵyn bıznes sýbektilerine býhgalterlik jáne salyqtyq esepti daıyndaý, ony tapsyrý jóninde konsýltasııalyq kómek kórsetý. Bıznes ókilderi salyq zańnamasyna qatysty túsinbeı júrgen saýaldaryn mamandarǵa qoıyp, tegin keńes ala alady.
Kásip ıelerine keńes beretin «Halyq býhgalteri» quramyna tájirıbeli býhgalterler, kásibı aýdıtorlar, belgili býhgalterlik birlestikterdiń ókilderi, aýmaqtyq memlekettik kirister organdarynyń mamandary enip otyr. Qarjy mınıstrligi taratqan habarlamada mamandar ártúrli resmı resýrstar men áleýmettik jeliler arqyly keńes beredi dep kórsetilgen. Sonyń ishinde osy aksııaǵa arnalǵan arnaıy Telegram arnasy iske qosylypty.
«Halyq býhgalteri» aksııasy aıasynda onlaın-konsýltasııalar, vebınarlar, esepti kezeńderdegi taqyryptyq konsýltasııalyq sessııalar ótkiziledi. Kásipkerlermen betpe-bet kezdesýler uıymdastyrylyp, olardy tolǵandyrǵan suraqtarǵa jaýap beriledi, aqparattyq-túsindirý jumystary júrgiziledi. Negizgi format – qalalar men oblys ortalyqtaryndaǵy memlekettik kirister basqarmalary bazasynda oflaın qabyldaý.
Mınıstrlik ókilderiniń sózinshe, keńes berý 2026 jylǵy qańtar-aqpanda aptasyna 3 ret, naýryzdan bastap 2 ret ótedi.
Astana, Almaty men Shymkent qalalarynda konsýltasııalar ótkizý úshin jeke oryndardy belgileý josparlanyp otyr. Al óńirlerde aýdandyq deńgeıde, qajet bolǵan jaǵdaıda mamandar ózderi baryp, keńes beredi. Qabyldaý kezinde qalalyq, aýdandyq basqarmalar arasynda beınebaılanys pen telefon arqyly keńes berý múmkindigi de qarastyrylǵan. «Halyq býhgalteri» aksııasy kezinde Qarjy mınıstrligine qarasty Call-ortalyqtar da qyzý jumys istep, arnaıy materıaldar bazasyn jańartady, SalykBot Telegram-arnasy aqparatpen tolyqtyrylady.
«Alǵash ret ótkizilip otyrǵan bul aksııa salyq tóleýshilermen jumys isteıtin mekemelerdiń aqparattyq júıelerin jetildirip, ondaǵy málimetterdi jurtshylyqqa qoljetimdi etýdi kózdeıdi. Aldaǵy ýaqytta quqyq buzýshylyqtardyń aldyn alýǵa jáne konsýltasııalyq qoldaýdyń sapasyn arttyrýǵa baǵyttalǵan basqa da qosymsha is-sharalardy qolǵa alýdy josparlap otyrmyz», deıdi vedomstvo ókilderi.
Aksııa 2026 jylǵy 30 maýsymǵa deıin jalǵasady.
