52 myń gektar jerdi ıgerip, 250 adamdy jumyspen qamtyp otyrǵan sharýashylyq 2002 jyldan beri elıtalyq tuqym da óndiredi.
Seriktestik basshysy, «Aýyl» partııasynyń múshesi Amanǵos Tóleýov 2025 jyly Memleket basshysynyń Jarlyǵymen «Qazaqstannyń Eńbek Eri» ataǵyna ıe bolǵanyn aıta keteıik. Kezdesý barysynda onyń agrarlyq sala men partııa jumysyna qosqan úlesi joǵary baǵalanyp, «Aýyl» partııasynyń 25 jyldyq mereıtoılyq medali saltanatty túrde tabystaldy.
– Byltyr Aýyl sharýashylyǵy eńbekkerleriniń birinshi forýmynda Memleket basshysy Qasym-Jomart Kemeluly Toqaev jylqy sharýashylyǵyn ǵylymı negizde damytý úshin ǵylymı zertteý ınstıtýtyn qurý mindetin alǵa qoıǵan bolatyn. Osy tapsyrma aıasynda Aqtóbe oblysynda «Qazaq jylqy sharýashylyǵy jáne jemshóp óndirisi» ǵylymı-zertteý ınstıtýtynyń jańa ǵımaraty salynyp jatyr. Bul joba otandyq seleksııany damytýǵa, asyltuqymdy jylqylardy keshendi túrde zertteýge, jylqy eti men qymyzdy eksportqa baǵyttaýǵa, sondaı-aq ulttyq jáne sporttyq baǵyttaǵy jylqy sharýashylyǵyn damytýǵa jol ashady, – dep atap ótti depýtat.
Búgingi tańda ınstıtýt qurylymynda zamanaýı zerthanalar, manej, atqora, veterınarııalyq pýnkt pen jarys joly qarastyrylǵan. Munda 67 adam jumys isteıdi, onyń ishinde 4 aýyl sharýashylyǵy ǵylymdarynyń doktory men 3 ǵylym kandıdaty bar.
Búgin Májilis depýtattarynyń óńirlerdegi kezdesýleri bastaldy. 13 qańtarǵa deıin jalǵasatyn jumys saparlary barysynda «AMANAT», «Aýyl», «Aq jol», «JSDP», «QHP» jáne «Respublica» saıası partııalarynyń parlamenttik fraksııalarynyń depýtattary saılaýshylardy qabyldanǵan zańdar týraly habardar etedi, olardyń jergilikti jerlerde qoldanylý barysyn zerdeleıdi jáne azamattardy tolǵandyratyn ózekti máseleler men problemalardy tyńdaıdy.
