Jıynǵa Túrki elderiniń iskerlik sala ókilderi qatysty. Atap aıtqanda, R.Batalov («Atameken», Qazaqstan), M.Kárimsaqov (Syrtqy saýda palatasy, Qazaqstan), B.Ámreev (Túrki ınvestısııalyq qory), M.Bashqurt (Túrki álemi mýnısıpalıtetter odaǵy), A.Kýla (Túrki saýda-ónerkásip palatalary odaǵy), V.Zeınalov (Ázerbaıjan), M.Bakırov (Qyrǵyzstan), M.Gýrdov (Túrikmenstan), A.Shaıhov (О́zbekstan) jáne basqa da ókilder boldy.
Kezdesý barysynda Túrki memleketteri arasyndaǵy ekonomıkalyq yntymaqtastyqty damytý, saýda-ekonomıkalyq baılanystardy keńeıtý, sondaı-aq qatysýshy elderdiń iskerlik toptary arasyndaǵy ózara is-qımyldy nyǵaıtý máseleleri talqylandy.
Aıda Balaeva Túrki saýda-ónerkásip palatalary odaǵynyń jalpytúrkilik ekonomıkalyq múddelerdi ilgeriletý men birlesken bastamalardy iske asyrýǵa arnalǵan mańyzdy ári tıimdi alań ekenin atap ótti. Sondaı-aq saýda-ónerkásip palatalarynyń bıznes-qoǵamdastyqtar arasynda tikeleı dıalog ornatýda jáne memleketaralyq kelisimderdi naqty ekonomıkalyq jobalarǵa aınaldyrýda sheshýshi ról atqaratyny sóz etildi.
Sondaı-aq odaqqa múshe elder arasyndaǵy ınvestısııalyq áriptestikti damytýǵa yqpal etetin Túrki ınvestısııalyq qorynyń jumysyn jandandyrý qajettigi talqylandy.
Túrkitildes elderdegi týrızm men týrıstik salany damytý, kólik-logıstıkalyq baǵyttardy keńeıtý, ónerkásiptik kooperasııa, sıfrlandyrý jáne ınnovasııalyq sheshimderdi, onyń ishinde jasandy ıntellektini engizý máselelerine aıryqsha mán berildi.
Kezdesý qorytyndysy boıynsha taraptar Túrki memleketteri uıymy aıasynda ekonomıkalyq ıntegrasııany odan ári nyǵaıtýǵa jáne seriktes eldermen praktıkalyq yntymaqtastyqty damytýǵa daıyn ekenin rastady.
