«Biz aralaǵan ańǵar ejelgi zamanda Tetıs muhıtynyń tabany bolǵan. Keıin jer qyrtysy qozǵalyp, Pangeıa bólinip, sý keıin shegindi. Sóıtip myńdaǵan jyldar boıy tabıǵat alyp tas músinderdi qalyptastyrdy. Jazyqtyń ortasynan qylyshtaı ótkir jartas shoqylar, ústirtter men ıilgen kúmbezge uqsas bıikter boı kóteredi. Bul aımaq sonshalyqty uzaq ýaqyt boıy qurǵaq ári ıen qalǵandyqtan, mıllıondaǵan jyldyq tarıhtyń izi áli kúnge deıin anyq kórinedi», dep jazady saıahatshy-jýrnalıst.
Tilshiniń tiline tıek bolyp otyrǵan Tetıs sýy – mezozoı dáýirindegi alyp muhıt-tuǵyn. Ol qazirgi Eýrazııa men Afrıka-Arabııa aralyǵyn alyp jatqan. Jer qyrtysynyń qozǵalysyna baılanysty azaıyp, bir jola tartylyp ketken. Qazirgi Mańǵystaý dál osy Tetıs muhıtynyń astynda jatqan. Ǵalymdar ony teńiz janýarlarynyń qaldyqtary arqyly dáleldegen.
Bul nárse Amerıkadan kelgen jýrnalısttiń de nazaryn aýdarǵan. Buǵan qosa Djennıfer Mıýller Mańǵystaýdaǵy kerýen-saraılardyń qırandylaryn, sopylyq ǵıbadathanalary men jerasty meshitterin asqan tańdanyspen basylymǵa jarııalaǵan.
«Ǵalymdar olardyń qalaı paıda bolǵany jóninde áli kúnge deıin ortaq pikirge kelgen joq. Al maǵan bul alqap bir kezderi qudaılardyń oıyn alańy bolǵan degen nusqa kóbirek unaıdy», dep jazady jýrnalıst.
Avtordyń aıtýynsha, uzaq ýaqyt boıy bul óńir halyqaralyq týrısterdiń nazarynan tys qalyp kelgen, alaıda búginde oǵan degen qyzyǵýshylyq artyp otyr. Sapar barysynda jýrnalıst Reseı, Qytaı jáne Italııadan kelgen týrısterdi jolyqtyrǵanyn aıtady. Al amerıkalyq saıahatshylar bul baǵytty endi ǵana tanı bastaǵan. Jýrnalıst jolserigi Anton Dıkınnen bilgeninshe, ol on jyldan astam ýaqyt boıy óńirde týr uıymdastyryp júrse de, AQSh-tan kelgen qonaqty áli kezdestirmegen.
Djennıfer Mıýller bir túndi «kıiz úı motelinde» ótkizgenderin aıtady. Alaıda keıin top músheleriniń bári bir aýyzdan dalada, tabıǵat aıasynda oıanǵandy qalar edik degen oıǵa kelgen. Bul Mańǵystaýǵa keletin saıahatshylardyń óńirge eń aldymen biregeı tabıǵatpen jáne adam qoly tımegen keńistiktermen qaýyshý úshin at basyn buratynyn kórsetedi.
Aıta keteıik, «Washington Post» 1877 jyly Vashıngton qalasynda qurylǵan. Alǵashynda aımaqtyq basylym bolǵanymen, ýaqyt óte kele The Washington Post ulttyq ári halyqaralyq deńgeıdegi, qoǵamdyq pikir men saıası kún tártibine eleýli yqpal etetin basylymǵa aınaldy. 2025 jylǵy jaǵdaı boıynsha The Washington Post basylymynyń shamamen 2,5 mıllıon sıfrlyq jazylýshysy bar. Bul saıttyń aqyly aýdıtorııasy men sıfrlyq jańalyqtarǵa jazylǵan oqyrmandar sanyn kórsetedi. Al baspa nusqasynyń taralymy – kúndelikti shamamen 97 myń dana.
Budan eki apta buryn AQSh-tyń jetekshi Dıýk ýnıversıtetiniń gazetinde qazaq folklory týraly maqala jaryq kórgen edi.
