Foto: medicalbusinesschool.com
Erli-zaıyptylarǵa asa iri kólemde alaıaqtyq jasaý jáne aldyn ala sóz baılasý arqyly qylmystyq jolmen alynǵan aqshany zańdastyrý baptary boıynsha aıyp taǵyldy. Prokýror Daýlet pen Tolqyn Totaqanovtardy kináli dep tanyp, árqaısysyn 7 jylǵa bas bostandyǵynan aıyrýdy surady. Áıel adamǵa qatysty prokýror kámeletke tolmaǵan balasynyń bolýyna baılanysty úkimniń oryndalýyn 2 jylǵa keıinge qaldyrýdy usyndy.
Buǵan deıin Qarjylyq monıtorıng agenttigi erli-zaıyptyny ulyn emdeýge aqsha jınaý kezinde alaıaqtyq jasady degen kúdikke ilingenin habarlaǵan. Tergeý derekterine súıensek, olar 1,3 mlrd teńgeden astam qarajat jınap, onyń tek 6,4 mln teńgesin ǵana maqsatty túrde paıdalanǵan. Aqsha Instagram jáne Facebook jelilerindegi belsendi jarnama arqyly jınalǵan, qarajattyń edáýir bóligi jarnamany ilgeriletýge, sondaı-aq jyljymaıtyn múlik, kólik satyp alýǵa jáne bás tigýge jumsalǵan. Qajetti soma jınalǵanyna qaramastan, shetelde jasalýy tıis dep kórsetilgen ota oryndalmaǵan, tek sonyń kórinisi jasalǵan. Tergeý bastalǵannan keıin erli-zaıyptylar múlikti jasyrýǵa árekettengen, alaıda tergeý bul mámilelerdi jalǵan dep tanyǵan.
Sot Totaqanovanyń jáne onyń anasynyń esepshottaryna shamamen 2,2 mlrd teńge túskenin, onyń ishinde 1,4 mlrd teńgesi qaıyrymdylyq qarajaty ekenin anyqtady. Úkimde sýdıa qarajattyń tómendegi jyljymaıtyn jáne jyljymaly múlikterdi satyp alýǵa jumsalǵanyn kórsetti:
-
jalpy quny 47 mln teńge bolatyn eki páter;
-
jalpy quny 8 mln teńge bolatyn jer telimderi;
-
quny 28 mln teńge bolatyn LEXUS RX 300 avtokóligi;
-
quny 8,2 mln teńge bolatyn Hyundai Santa Fe avtokóligi;
-
quny 15 mln teńge bolatyn Toyota Camry 75 avtokóligi;
-
Toyota Land Cruiser Prado 150 avtokóligi (baǵasy anyqtalmaǵan).
Sonymen qatar erli-zaıypty brendtik taýarlar satyp alyp, qumar oıyndarǵa qatysyp, oǵan 9,7 mln teńge jumsaǵan. Facebook Ads jarnama platformasynyń qyzmetteri úshin 481 mln teńge tólep, 349,5 mln teńge kólemindegi qaryzdaryn japqan. Sondaı-aq sot aıyptalýshylardyń áreketterinen qylmystyq jolmen alynǵan aqshany zańdastyrý belgileri bar ekenin atap ótti. Tergeý depozıttik shottardaǵy qarajattan paıyz túrinde tabys alynǵanyn da anyqtaǵan.
Balanyń emine bar bolǵany 6,4 mln teńge baǵyttalǵan.
«Totaqanovtar kináli dep tanylyp, jazalardy ishinara qosý arqyly 7 jylǵa bas bostandyǵynan aıyryldy, qaıyrymdylyq jınaýmen baılanysty qyzmetpen 10 jyl aınalysý quqyǵynan aıyryldy, múlki tárkilenip, jazasyn ortasha qaýipsizdik deńgeıindegi qylmystyq-atqarý júıesi mekemesinde óteıdi», delingen sýdıa úkiminde.
Sot úkimi ázirge ázirge zańdy kúshine engen joq.
