Foto: ashyq derekkóz
Kezdesýden buryn Tramp óziniń áleýmettik jelisinde Venesýelanyń munaı sektoryna keminde 100 mlrd dollar ınvestısııa salýdy kózdeıtinin jarııalaǵan.
Tramp josparyna sáıkes, ınvestısııa salatyn kompanııalar ózderi qarjy jumsap, al Venesýelanyń naryǵyna shyǵý jónindegi kelissózdi tek AQSh úkimeti júrgizetin bolady.
«Sizder kelissózderdi tikeleı bizben júrgizesizder, Venesýelamen eshqandaı kelissózge barmaısyzdar. Biz muny qalamaımyz», dedi prezıdent.
Aq úıge Chevron, Exxon, Conoco Phillips, Shell, Marathon, Valero, Repsol, Eni, Trafigura, Vitol Americas sııaqty álemdik munaı kompanııalarynyń ókilderi jáne AQSh memlekettik hatshysy Marko Rýbıo men energetıka mınıstri Krıs Raıt kelgen.
Chevron – Venesýelada jumys isteıtin jalǵyz iri amerıkalyq kompanııa. AQSh úkimeti oǵan osy elde jumys isteýge ruqsat berip, sanksııalardan bosatqan. Shevron kompanııasynyń vıse-prezıdenti Mark Nelson basqa iri kompanııalar eldegi saıası turaqsyzdyq pen shyǵyndardyń kóptigine baılanysty uzaq merzimdi ınvestısııaǵa áli daıyn emes ekenin málimdegen.
Kongrestiń kelisiminsiz Venesýelaǵa shabýyldaýǵa bolmaıdy: Senat Trampqa shekteý qoıdy
AQSh prezıdentiniń aıtýynsha, Venesýeladaǵy munaı eksportyn baqylaý qazir Vashıngtonnyń qolynda. 6 qańtarda Tramp Venesýeladaǵy ýaqytsha bılik AQSh-qa 50 mln barrel munaı beretinin málimdedi. Bul munaıdyń naryqtaǵy baǵasy shamamen 2,8 mlrd dollardy quraıdy. Prezıdent AQSh bul munaıdy jeke baqylap, túsetin tabysty Venesýela halqy men AQSh ıgiligine jumsaıtynyn atap ótti.
Aıta keteıik, buǵan deıin Venesýelanyń bul kúıge qalaı túskenin saraptaǵan bolatynbyz.
