Atyraý jylý elektr ortalyǵy qalany jylý energııasymen, aımaqtyń basym bóligin elektr energııasymen qamtamasyz etedi. Al gaz jetkizý barysyndaǵy kez kelgen irkilis nemese jetkizý shartynyń ózgerýi tarıfke jáne áleýmettik turaqtylyqqa tikeleı áser etedi. Buǵan deıin Májilis alańynda aıtylǵandaı, qolaısyz jaǵdaı týyndaıtyn bolsa, elektr energııasynyń tarıfi 41%-ǵa, al jylý tarıfi 91%-ǵa deıin ósýi múmkin edi. Alaıda «Teńizshevroıl» JShS men «QazaqGaz» UK» AQ arasynda Atyraý JEO-men jasalǵan kelisimdi bıyl 30 sáýirge deıin uzartý jóninde ýaǵdalastyq bar.
Kezdesýde Májilis depýtaty Dúısenbaı Turǵanov Memleket basshysynyń tapsyrmasyna sáıkes, Úkimet bıyl I toqsannyń sońyna deıin tutynýshylardyń barlyq sanaty úshin kommýnaldyq tarıf baǵasyn qymbattatpaý týraly sheshim qabyldanǵanyn eske saldy. Bul shara azamattardy qorǵaý jáne baǵa qysymyna jol bermeý úshin qabyldanǵan.
Májilismen «Teńizshevroıl» JShS-nyń «Atyraý JEO» kásipornyna gaz jetkizýdi toqtatý týraly sheshimi óńirdiń elektr qýatymen jáne jylýmen qamtylýyna qaýip tóndirip qana qoımaı, qoldanystaǵy zańnamaǵa da qaıshy keletinin atap ótti.
«AMANAT» partııasy Atyraý jylý elektr ortalyǵynyń gazben tolyq ári turaqty qamtamasyz etilýin talap etedi. Bul – turaqty jylýmen qamtý, tarıf qymbatshylyǵyna jol bermeý qadamdarymen tikeleı baılanysty másele. Buǵan deıin de atap ótkenimdeı, qoldanystaǵy zańnama strategııalyq nysandarǵa deldaldar arqyly gaz jetkizýge tyıym salady. Sondyqtan gaz jetkizý máselesin Parlament deńgeıinde kóterdik. «AMANAT» partııasy fraksııasynyń kúsh-jigeri arqyly ýaqytsha sheshim tabyldy. Endi biz «Teńizshevroılmen» uzaqmerzimdi yntymaqtastyqty qaıta jandandyrýǵa jáne ony júıeli jolǵa qoıýǵa kúsh salamyz. Bul – óńirdiń energetıkalyq qaýipsizdigine qatysty mańyzdy másele», dedi depýtat.
Sondaı-aq Dúısenbaı Turǵanov Májilis depýtattary gazben jabdyqtaý, taýarlyq gazdy únemdi tutyný máseleleri jónindegi zań jobasy boıynsha jumys istep jatqanyn atap ótti. Bul qujat naryqty retteýge, tutynýshylardy qorǵaýǵa jáne jeke gaz taratý uıymdaryna memlekettik retteý júrgizýdi kúsheıtýge baǵyttalǵan.
El ıgiligi úshin: 2025 jyly gaz salasy qandaı jetistikterge qol jetkizdi?
Aıta keteıik, keıingi úsh jylda partııanyń saılaýaldy baǵdarlamasy aıasynda Atyraý oblysynda shamamen 220 shaqyrym gaz jelileri tartylyp, shalǵaıdaǵy 8 eldi meken kógildir otynmen qamtamasyz etildi.
