Foto: Májilistiń baspasóz qyzmeti
«Amanat» partııasy fraksııasynyń músheleri Qaırat Balabıev, Ulasbek Sádibekov, Temir Qyryqbaev, Nursultan Baıtilesov, Erlan Ábdıev Túrkistan oblysy Ordabasy aýdany Badam aýyldyq okrýgi «Badam» ındýstrıaldy aımaǵyndaǵy «Central Asia Aluminium Company» JShS jumysymen tanysty. Alıýmınıı profılderin óndiretin bul kásiporynda 200 adam turaqty jumyspen qamtylǵan. Jobanyń alǵashqy kezeńinde 4,4 mlrd teńge ınvestısııa salynǵan zaýyt óniminiń basym bóligi eksportqa shyǵarylady. Depýtattar bul óndiris orny Memleket basshysy Qasym-Jomart Toqaevtyń otandyq ónim kólemin arttyrý, óńdeý ónerkásibin damytý jáne eksportqa baǵdarlanǵan óndiristerdi qoldaý jónindegi tapsyrmalarynyń naqty júzege asýy ekenin atap ótti.
Sonymen qatar Májilis depýtattary óńirdiń agrarlyq áleýetin damytý máselesine de nazar aýdardy. Bul baǵytta qabyldanyp jatqan zańnamalyq jáne ınstıtýsıonaldyq sharalar partııanyń saılaýaldy baǵdarlamasynda da naqty kórinis taýyp otyrǵanyn jetkizdi.
– О́ndiris pen aýyl sharýashylyǵynyń qatar damytýdyń mańyzy zor. Parlament tarapynan ınvestorlarǵa qolaıly zańnamalyq orta qalyptastyrý, otandyq kásiporyndardyń básekege qabiletin arttyrý baǵytyndaǵy jumys júıeli túrde jalǵasyn tabady, – dedi depýtat T.Qyryqbaev.
Jumys sapary barysynda depýtattar jýyrda Shubarsý aýylynda paıdalanýǵa berilgen 600 oryndyq «Parasat» jalpy bilim berý mektebine de bardy. Byltyr jeltoqsanda ashylǵan úsh qabatty bilim ordasy 50 myńnan asa turǵyny bar aýyldyń júktemesin azaıtyp, bilim sapasyn arttyrýǵa septesedi. Ári munda 70-ke jýyq adam turaqty eńbek etedi.
– Bilim berý ınfraqurylymyn damytý – eldiń bolashaǵyna salynǵan ınvestısııa. Prezıdent bastamasymen júzege asyp jatqan bul jobalar jas urpaqtyń sapaly bilim alýyna jáne aýyl men qala arasyndaǵy bilim teńsizdigin joıýǵa baǵyttalǵan, – dedi depýtat Q.Balabıev.
Al «Respublica» partııasynan saılanǵan Májilis depýtaty Aıtýar Qoshmambetov Atyraý oblysyndaǵy kásipkerlermen kezdesip, bıznestiń kúndelikti jumysynda týyndaıtyn naqty túıtkilderdi tyńdady. Sonyń biri – metall jáne elektrotehnıkalyq buıymdar óndiretin, qarqyndy damyp kele jatqan «CENTECH» kompanııasy.
100 paıyz otandyq kásiporyn óńirdiń óndiristik áleýetin arttyrýǵa óz úlesin qosyp keledi. Desek te, nysan basshysy Azamat Kókenov jergilikti kásiporyndar úshin iri kompanııalarmen básekege túsý ońaı emes ekenin aıtyp qaldy. Negizgi túıin ishki naryqta otandyq ónimge turaqty suranys qalyptastyrýǵa, memlekettik jáne kvazımemlekettik sektorda ózimizdiń taýarlarǵa naqty basymdyq berýge, jergilikti kásiporyndarǵa uzaqmerzimdi jumys isteýge múmkindik jasaıtyn júıeli tetikterdi iske qosýǵa kelip tireledi. О́ıtkeni ishki naryqta suranys bolmasa, kez kelgen qoldaý ýaqytsha ǵana áser beredi.
Májilismen «Dına» saýda ortalyǵynda jergilikti kásipkerlermen de júzdesti. Kezdesýde bankter usynatyn nesıelerdiń paıyzdyq ústemesi, taýar tasymalyna qatysty engizilgen elektrondy tirkeý júıesi jáne jol ınfraqurylymynyń sapasy syndy problemalar ortaǵa salyndy.
О́z kezeginde «Amanat» partııasy fraksııasynyń múshesi Dúısenbaı Turǵanov Atyraý jylý elektr ortalyǵynyń ujymymen kezdesip, jylý maýsymynda týyndaýy múmkin qıyndyqtar men óńirdi turaqty energııamen qamtamasyz etý máselelerin talqylady. Kezdesýde tarıf turaqtylyǵyna, sondaı-aq azamattardyń jaıly turmysyna tikeleı áser etetin jylý elektr ortalyǵyn gazben qamtamasyz etý jumysyna basa nazar aýdaryldy.
Murat Ábenov, Marhabat Jaıymbetov jáne Murat Ergeshbaev Qyzylorda oblysyna jumys sapary kezinde jergilikti «Eko taksı» otandyq servısiniń jumysymen tanysty, sondaı-aq Prezıdenttik saıabaqty qaıta qurý barysyn tekserdi. Atalǵan joba osydan eki jyl buryn Memleket basshysynyń «Taza Qazaqstan» jalpyulttyq ekologııalyq bastamasy aıasynda iske qosylǵan edi. Munda ár júrgizýshige bir reıs úshin 60 teńge tólenedi, al tapsyrystyń qalǵan somasy onyń esebine tikeleı túsedi. Júrgizýshilerge úılestirýshi uıymdar arqyly jalaqy men áleýmettik aýdarymdar tólenedi, jumysqa shyqqandar kún saıyn medısınalyq tekserýden ótedi. Servıstiń jumysyn memlekettik organdar qatań baqylaýda ustaıdy.
Sondaı-aq depýtattar Qyzylordadaǵy Prezıdenttik saıabaqty qaıta qurý jumysyn baqylady. Jańartý jumystary aıaqtalǵan soń saıabaqta 300 oryndyq balalar lageri, botanıkalyq baq, sýburqaqtary bar alleıalar, amfıteatr, sport jáne oıyn alańdary, workout oryndary, fýdkort, velojoldar men shaǵyn sý arnalary paıda bolady.
Soltústik Qazaqstan oblysyna barǵan «Amanat» partııasy fraksııasynyń músheleri Erkebulan Mámbetov pen Dmıtrıı Koloda Petropavldaǵy sańyraýqulaq fermasynyń tájirıbesimen tanysty. Byltyr 20 jeltoqsanda iske qosylǵan «Eco Glade» JShS kásiporny jylyna 2 400 tonnaǵa deıin agaricus tektes sańyraýqulaq pen 4 myń tonna kompost, ıaǵnı shymtezek óndirýge baǵdarlanǵan. Kásiporyn 65 adamdy turaqty jumyspen qamtyp otyr. Depýtattar bul kásiporyn óńirdiń qaıta óńdeý sektoryn damytýǵa jáne azyq-túlik qaýipsizdigin arttyrýǵa septigin tıgizetinin atap ótti. Joba arnaıy ekonomıkalyq aımaqtyń jeńildikterin paıdalana otyryp iske asyrylýda, bul óndiristi jedeldetip iske qosýǵa jáne ınvestısııalyq shyǵyndardy azaıtýǵa múmkindik berdi.
Sondaı-aq májilismender kásiporyn qyzmetkerlerine óńirlerdiń derbestigin kúsheıtýge baǵyttalǵan jańa Bıýdjet jáne Salyq kodeksteri sheńberindegi zańnamalyq normalar týraly aıtyp berdi.
