Eń joǵary ósim shamamen 43 paıyz kórsetkishpen Pavlodar qalasynda tirkelgen. Odan keıin Petropavl, Aqtóbe jáne О́skemen qalalary tur. Al baǵa kórsetkishteri eń az ózgergen Qonaev pen Kókshetaý qalalary.
Mamandardyń aıtýynsha, baǵanyń kúrt ósýi turǵyn úı usynysy tapshy óńirlerde baıqalǵan. Mundaı aımaqtardyń kópshiliginde jaldamaly turǵyn úı naryǵy shaǵyn, al suranys kún saıyn artyp keledi. Buǵan aýyldardan qalalarǵa kóshi-qon, sondaı-aq Qazaqstan boıynsha sheteldik stýdentterdiń kóptep kelýi áser etip otyr. Osyndaı jaǵdaıda páter ıeleri jalǵa berý aqysyn kúrt kóterip jiberedi.
Almaty qalasynyń turǵyny Gúlmıra Álimqulova eki bólmeli jaldamaly páterde turady. Jalǵa alý aqysyna qosa, ol barlyq kommýnaldyq qyzmetterdi de ózi tóleıdi. Turǵynnyń aıtýynsha, jýyrda páter ıesi jaldaý qunyn birden 80 myń teńgege kótergen.
«Qyrkúıekte qońyraý shalyp, barlyq jerde baǵa óskenin aıtty: «О́zderińiz de kórip otyrsyzdar, qazir baǵalar múlde basqa. Baǵany kótereıik» dedi. Ol jaldaý aqysyn 250 myń teńgege deıin kóterýdi surady. Buryn 170 myń edi. Páterdiń aýmaǵy shamamen 42 sharshy metr. As úıi – bar bolǵany 6 sharshy metr, shaǵyn. Jóndeýi de eskileý. Kommýnaldyq qyzmetterge aıyna shamamen 15-20 myń teńge ketedi. Oǵan qosa ınternetke taǵy 15 myń teńge tóleımiz», deıdi ol.
Orta eseppen Qazaqstanda páter ıeleri bir sharshy metr úshin 5 myń teńgeden joǵary aqy suraıdy. Eń qymbat jaldamaly turǵyn úı áli de Almaty qalasynda. Odan keıin Astana, Qaraǵandy, Petropavl jáne Shymkent qalalary keledi. Al eń arzan páterlerdi Taraz ben Túrkistanda jalǵa alýǵa bolady.
Elimizde turǵyn úıdi jalǵa alý baǵasy ósti. Baspana qaı aımaqta qymbatqa túsedi?
Mamandar turǵyn úıdi jalǵa alýdyń eń tıimdi ýaqyty – jazdyń basy ekenin aıtady. Al kúzge qaraı, ádette, stýdentterdiń kóptep kelýine baılanysty jaldaý baǵasy qymbattaıdy.
