Foto: ashyq derekkóz
Forbes derekterine súıengen 2026 jylǵy ınfografıkaǵa sáıkes, álemdegi eń baı adam retinde Ilon Mask tirkeldi. Onyń dáýleti 714,2 mlrd dollardy qurap, tarıhta alǵash ret bir adam 700 mlrd dollar mejesinen asty. 2020 jyly álemdegi eń baı adam Djeff Bezos edi, ol kezde onyń baılyǵy 145 mlrd dollar bolǵan. Qazir Masktyń kapıtaly sol kórsetkishten bes ese joǵary.
Ilon Masktyń baılyǵy alty jyl ishinde shamamen otyz ese ósti. Onyń negizgi tabys kózderiniń biri SpaceX kompanııasyndaǵy úlesi. Bul pakettiń qazirgi quny 366 mlrd dollarǵa baǵalanyp otyr. Kompanııanyń naryqtyq baǵasy qazirdiń ózinde 800 mlrd dollar shamasynda. Eger 2026 jyly SpaceX aksııalaryn bırjaǵa shyǵarý júzege assa, kapıtalızasııasy 1,5 trln dollarǵa deıin ósýi múmkin.
Ekinshi orynda Google kompanııasynyń negizin qalaýshy Larrı Peıdj tur. Onyń baılyǵy 257,7 mlrd dollarǵa jetken. 2025 jyly Alphabet aksııalary 63 paıyzǵa qymbattap, Peıdjdiń jeke kapıtaly aıtarlyqtaı artqan.
Nvidia kompanııasynyń bas dırektory Djensen Hýang 162,5 mlrd dollarmen álemdegi segizinshi orynǵa jaıǵasqan. Sońǵy jeti jylda Nvidia aksııalary 4 200 paıyzdan astam ósip, Hýangty eń jyldam baıyǵan mıllıarderlerdiń qataryna qosty.
Al Bıll Geıtstiń jaǵdaıy ózgeshe. 2020 jyly ol álemdegi ekinshi eń baı adam bolǵan. Qazir 18-orynǵa tústi. Onyń baılyǵy osy kezeńde kóp ózgergen joq. Buǵan Geıtstiń ondaǵan mıllıard dollardy Bıll men Melında Geıts qory arqyly qaıyrymdylyqqa baǵyttaýy sebep boldy.
