«Astana Musical» memlekettik mıýzıkl teatrynyń kórkemdik jetekshisi Eslám Nurtazınniń rejısserlik saraptaýynda qoıylǵan spektakldiń basty ereksheligi – ulttyq mýzyka men álemdik án mádenıetiniń bir sahnada toǵysýy. Qoıylymda qazaq estradasynyń altyn qoryna engen Shámshi Qaldaıaqov pen Eskendir Hasanǵalıevtiń ánderi, ańyzǵa aınalǵan «Dos-Muqasan» ansambliniń shyǵarmalary, sondaı-aq HH ǵasyr mýzykasyna tyń serpin ákelgen «The Beatles» tobynyń tanymal kompozısııalary oryndaldy. Aıtýly ánder qoıylymnyń dramatýrgııalyq jelisin baıytyp, kórermenge erekshe emosııalyq áser syılady.
Lıbretto avtory – Qazaqstannyń eńbek sińirgen qaıratkeri Baqyt Qaıyrbekov, aýdarmashy, dramatýrg – Ánnas Baǵdat. Al spektakldiń mýzykasyn jazǵan – tanymal dırıjer, Qazaqstannyń eńbek sińirgen qaıratkeri Artýr Orenbýrgskıı.
«Dostar serti» mıýzıkli elimizdiń ár óńirinen kelgen tórt jas jigittiń óner jolyndaǵy taǵdyryn arqaý etedi. Konservatorııaǵa oqýǵa túsý úshin úlken qalaǵa jınalǵan jas talapkerlerdi ortaq arman men mýzykaǵa degen súıispenshilik biriktiredi. Qoıylymda olardyń arasyndaǵy shynaıy dostyq, ómirlik tańdaý, kásibı báseke men adamgershilik qundylyqtar sahnalyq tilmen áserli jetkizdi. Avtorlar arqyly dostyqqa adaldyq, bir-birine senim artýdyń mańyzy aıqyn kórsetildi. 2016 jyldyń 16 qazanynda ótken premerasynan beri qoıylym teatr sahnasynan túspeı, turaqty kórermenin qalyptastyrdy.
Spektakldiń sahnalyq bezendirilýi men horeografııalyq sheshimderi de kórermen nazaryn aýdarmaı qoımaıdy. Zamanaýı ssenografııa, jandy orkestrdiń súıemeldeýi jáne akterlerdiń kásibı oıyny qoıylymnyń kórkemdik deńgeıin arttyra tústi. Ásirese jastarǵa arnalǵan tárbıelik máni zor týyndy retinde «Dostar serti» búgingi kúnniń ózekti máselelerimen úndesip jatyr.
Teatr ujymy mıýzıkldiń kórermenge rýhanı serpilis berip, ónerge degen qyzyǵýshylyqty arttyrýǵa baǵyttalǵanyn atap ótti. Al qoıylymdy tamashalaǵan kópshilik qaýym «Dostar sertin» tek mýzykalyq qoıylym ǵana emes, rýhanı áser syılaıtyn, oı salatyn spektakl retinde qabyldady. Árbir án men sahnalyq kórinis zaldaǵy kórermendi beıjaı qaldyrmaı, shynaıy emosııaǵa bóledi.
Aıta ketý kerek, mıýzıkl jyl boıy «Astana Musical» teatrynyń sahnasynda turaqty túrde qoıylady. О́nersúıer qaýym úshin bul – dostyqtyń qadirin, ónerdiń qudiretin sezinýge taptyrmas múmkindik. «Dostar serti» mıýzıkli áli talaı kórermenniń júreginen oryn alyp, qazaq mýzykalyq teatrynyń jarqyn jetistikteriniń birine aınalary sózsiz.
