Foto: kzlorda.com
Depýtattyń aıtýynsha tájirıbe eksportqa tyıym salý baǵanyń tómendeýine ákelmeıtinin kórsetip otyr. Mundaıda negizgi aýyrtpalyq óndirýshilerge túsedi. Al deldaldar men logıstıkalyq tizbektiń basqa qatysýshylary bul shekteýden zardap shekpeıdi.
«Sarapshylar baǵany tek eksportty shekteý arqyly turaqtandyrýdy tıimsiz dep esepteıdi. Bıznes qaýymdastyǵy da óz ustanymyn ashyq bildirip jatyr. Eger memleket ishki naryqqa qajetti ónim kólemin naqty aıqyndasa fermerler ony qamtamasyz etýge daıyn. Qazaqstan kartop jáne kókónis ósirýshiler odaǵynyń málimetinshe, qoımalar toly, sábiz ben kartop tapshylyǵy joq. Osyǵan baılanysty Aýyl sharýashylyǵy mınıstrligi usynǵan ónim tapshylyǵy jónindegi derekterdiń obektıvtiligine kúmán týyndaıdy. Bul memleket pen óndirýshiler arasynda júıeli dıalogtyń joq ekenin kórsetedi», dedi Temir Qyryqbaev.
Buǵan deıin «Egemen Qazaqstan» gazetiniń Pavlodardaǵy tilshisi Murat Qapanuly Ertis-Baıan óńiriniń fermerlerinde sábiz ónimi mol ekenin aıtyp, olardyń atalǵan ónim eksportyna shekteý engizbeýdi surap otyrǵanyn jazǵan edi. Tilshimiz keltirgen derekterdi depýtatattyq saýalynda Temir Qyryqbaev ta qaperge saldy.
«Pavlodar oblysyndaǵy fermerlerdiń qolynda 120 myń tonnadan astam sábiz qory bar. Qazirgi jaǵdaıda ony kelisi 80 teńgeden satýdyń ózi qıyn. Sebebi suranys tómen. Al sábiz – uzaq saqtalmaıtyn ónim. Sondyqtan eksportqa ýaqytsha shekteý qolda bar ónimdi ótkizý múmkindigin odan ári taryltady. Oılastyrylmaǵan ákimshilik sheshimder otandyq fermerlerdiń sheteldik naryqtardaǵy ornyn álsiretip, olardy básekelesterge ońaı berip qoıýǵa ákeledi. Fermerler jyldar boıy qalyptastyrǵan logıstıkasy men seriktestik baılanysy bir ǵana sheshimniń saldarynan úzilýi múmkin», dedi depýtat.
Ol buǵan deıin de kartop, et jáne pııaz eksportyna osyndaı shekteýler engizilgenimen, olardan naqty qorytyndy jasalmaǵanyna nazar aýdardy. Sonymen qatar, Úkimetten sábiz eksportqa shekteý engizý týraly usynys qandaı ekonomıkalyq jáne statıstıkalyq esepteýlerge negizdeldi, ishki naryq qajettiligi men qolda bar qorlar boıynsha qandaı derekter paıdalanylǵanyn jáne ishki naryqty kepildendirilgen kólemde ónimmen qamtamasyz etip, artyq ónimdi eksportqa shyǵarýǵa múmkindik beretin naqty ári túsinikti model ázirleý jospary qashan ázirlenetinin surady.
