Jıynda Energetıka mınıstrligi, «Samuryq-Energo», KEGOC jáne energııa óndirýshi uıymdar Prezıdenttiń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýynda qoıylǵan mindetter sheńberinde júrgizip jatqan qazirgi ınfraqurylymdy jańǵyrtý jáne jańa qýattardy generasııalaý jónindegi jumystardyń oryndalý qarqynyn talqylady.
Energetıka mınıstrligi aýqymdy ınvestısııalyq jospardy júzege asyrýdyń praktıkalyq kezeńine kóship jatyr. Búginde jalpy ınvestısııa kólemi 13 trln teńgeden asatyn jáne qýaty 15,3 GVt bolatyn 81 joba boıynsha jumys bastalǵan. Iske qosylyp jatqan jobalardyń edáýir bóligi elektr qýaty naryǵynyń tetigi arqyly jeke ınvestısııalardy tikeleı tartý esebinen júzege asyrylyp jatyr.
Energetıka mınıstrligi: Jeltoqsan aıynda KQK arqyly munaı jóneltý kólemi tómendedi
Erlan Aqkenjenov aldaǵy úsh jylda negizinen retteý qýatynyń tapshylyǵyn jabýǵa jáne Biryńǵaı energetıkalyq júıeniń ıkemdiligin arttyrýǵa baǵyttalǵan manevrli generasııa segmentin iske qosý josparlanyp otyrǵanyn baıandady.
«Qazirgi jumys júrgizilip jatqan nysandardy iske qosý 2027 jyldyń birinshi toqsanynyń sońyna qaraı ekonomıkanyń elektr energııasyna degen qajettiligin tolyǵymen jabýǵa jáne Qazaqstandy energııadan tapshylyq kórip otyrǵan elder qatarynan shyǵarýǵa múmkindik beredi. 2029 jylǵa qaraı elektr energııasynyń da, retteý qýatynyń da turaqty profısıtine qol jetkizilmek. Bul elimizdiń eksporttyq áleýetin arttyrýǵa jaǵdaı týǵyzady», dedi energetıka mınıstri Erlan Aqkenjenov.
Mınıstrlik málimetinshe, 2035 jylǵa deıin qosymsha 26 GVt-tan astam qýat óndirý kózderi iske qosylady. Jıynda «Samuryq-Energo» AQ basqarma tóraǵasy Qaırat Maqsutov pen «KEGOC» AQ basqarma tóraǵasy Nábı Aıtjanov baıandama jasady.
Premer-mınıstr energetıkalyq jobalardy júzege asyrý kezinde merzimderin keıinge ysyrý praktıkasyn synǵa aldy.
«Prezıdent energetıkada tıisti dınamıka joq ekenin birneshe márte aıtyp keledi. Sondyqtan, barlyǵyńyz kúsh jumyldyrýyńyz kerek. Barlyq josparlanǵan joba belgilengen merzimde júzege asyrylýy tıis. Eshqandaı úzilis, keıinge qaldyrý bolmaýy kerek. Mınıstr, «Samuryq-Energo» jáne KEGOC basshylary, sizder árbir nysan úshin tikeleı jaýaptysyzdar. Sizderdiń jumys oryndaryńyz – kabınetterde emes, qurylys alańdarynda», dep atap ótti Oljas Bektenov.
