Sýretti túsirgen – Erlan OMAR, «EQ»
Sońǵy jyldary qalada 109 myń oqýshyǵa arnalǵan 44 mektep salynyp, paıdalanýǵa berilgen. Onyń 23-i Memleket basshysynyń «Keleshek mektepteri» ulttyq jobasy aıasynda boı kóterdi. Ásirese, aldyńǵy oqý jyly erekshe nátıjemen este qaldy: bir jylda 64 myń orynǵa shaqtalǵan 25 mektep ashyldy.
Bıylǵy oqý jyly bastalǵaly beri elordada taǵy 9 mektep oqýshylardy qabyldady. Al 2026 jyly 13 jańa bilim ordasynyń qurylysy josparlanyp otyr. Qala ákimi mektepter salý barysynda tek ǵımarattyń ózine emes, aınalasyndaǵy aýmaqty abattandyrýǵa da aıryqsha mán beriletinin atap ótti.
Sonymen qatar 2027 jylǵa da naqty daıyndyq bastalǵan. Qazirgi tańda 40 myń orynǵa eseptelgen 16 memlekettik mektep pen 10 myń oryndyq 10 jekemenshik mekteptiń jobalyq qujattamasy ázirlenip jatyr. Bul qadam elordadaǵy oqýshy sanynyń ósýine aldyn ala jaýap berip, bilim berý sapasyn arttyrýǵa múmkindik beredi.
Astana ákimdiginiń málimetinshe, bilim berý nysandarynyń ýaqtyly salynýy qaladaǵy úsh aýysymdy jáne oryn tapshylyǵy bar mektepter máselesin kezeń-kezeńimen sheshýge jol ashady.
