Foto: Depositphotos.com
Bul – HǴS tarıhynda medısınalyq sebeptermen búkil ekıpajdyń merziminen buryn Jerge qaıtarylǵan alǵashqy jaǵdaıy. Medısınalyq qupııany saqtaý maqsatynda aty-jóni jarııalanbaǵan astronavttardyń biri ótken aptada (7-8 qańtarda) ózin qatty jaısyz sezingen. Jerdegi mamandarmen keńeskennen keıin NASA Crew-12 aýysymyn kútpeı, 4 astronavtty shuǵyl túrde keri qaıtarý týraly buryn-sońdy bolmaǵan sheshim qabyldady.
Ekıpaj quramynda:
- NASA astronavty, ekıpaj komandıri ári HǴS komandıri mindetin atqarǵan Maık Fınk,
- NASA astronavty Zena Kardman,
- Japonııanyń aeroǵarysh agenttiginiń astronavty Kımııa Iýı,
- «Roskosmos» ǵaryshkeri Oleg Platonov boldy.
Olar 2025 jyldyń tamyz aıynda Kanaveral múıisinen ushyrylyp, stansııada 6 aıdan 8 aıǵa deıin jumys isteýi tıis edi. NASA ókilderiniń aıtýynsha, ekıpaj ǵylymı baǵdarlamanyń basym bóligin oryndap úlgergen, josparly oralýyna nebári birneshe apta ǵana qalǵan.
«Biz mundaı jaǵdaılardy ondaǵan ret pysyqtaımyz. Sondyqtan bári dál ári úılesimdi ótti. Amerıkalyqtar men ǵarysh áýesqoılary alańdamasa bolady – NASA osyndaı syn-qaterlerge daıyn», dedi basqarma basshysy Djared Aızekman.
Maık Fınk Jerge merziminen buryn oralý týraly sheshimniń ońaı bolmaǵanyn, bul sheshim ekiudaı sezim qaldyrǵanyn moıyndady. Degenmen ol bul qadamnyń qajetti ári durys bolǵanyn atap ótti. Jerge qaıtpas buryn ol HǴS basqarýyn reseılik ǵaryshker Sergeı Kýd-Sverchkovqa tapsyrdy.
