Foto: Ashyq derekkóz
Mádenıet jáne aqparat mınıstrliginiń málimetinshe, Abaı atyndaǵy ádebıet pen óner salasyndaǵy memlekettik syılyǵyn berý jónindegi komıssııa 2026 jylǵa arnalǵan konkýrs bastalǵanyn habarlady. Baıqaý Qazaqstan Respýblıkasy Prezıdentiniń 2015 jylǵy 21 qańtardaǵy №993 Jarlyǵyna sáıkes ótkiziledi.
«Abaı atyndaǵy memlekettik syılyq Qazaqstan Respýblıkasynyń azamattaryna jáne sheteldikterge Qazaqstan mádenıetiniń damýyna erekshe baǵaly úles dep tanylǵan ádebıet pen óner salasyndaǵy asa úzdik shyǵarmalary úshin beriledi.
Abaı atyndaǵy memlekettik syılyqqa usynylǵan ujymdaǵy úmitkerlerdiń sany 5 adamnan aspaýy tıis, izdenýshiler ujymyna jumysty oryndaý prosesinde tek ákimshilik jáne uıymdastyrý fýnksııalaryn júzege asyrǵan tulǵalardy qosýǵa jol berilmeıdi.
Jumys Abaı atyndaǵy memlekettik syılyqqa bir ret qana usynyla alady. Bir avtor nemese avtorlar ujymy Abaı atyndaǵy memlekettik syılyqqa qatarynan eki ret usynyla almaıdy», delingen habarlamada.
Memlekettik syılyqqa irikteýden ótken jumystardyń tizimi jarııalandy
Aıta keteıik, buǵan deıin memlekettik syılyq alǵan eńbekter konkýrsqa jiberilmeıdi. Abaı atyndaǵy memlekettik syılyqqa osy syılyqtyń laýreatyna jańa jetistigi úshin qaıtadan berilýi múmkin, biraq kórsetilgen syılyq aldyńǵy berilgeninen keıin bes jyldan erte bolmaıdy.
Qujattar men shyǵarmashylyq materıaldardy qabyldaý merzimi – 2026 jylǵy 1 naýryzǵa deıin.
Úmitkerlerdi memlekettik organdardyń alqalary, shyǵarmashylyq odaqtar men shyǵarmashylyq ujymdar usyna alady. Baıqaýǵa usynylǵan avtorlar men eńbekter tizimi ashyq talqylaý maqsatynda respýblıkalyq buqaralyq aqparat quraldarynda jarııalanady. Al 2026 jylǵy Abaı atyndaǵy memlekettik syılyq ıegerleri týraly sheshim resmı túrde baspasóz betterinde habarlanady.
Mádenıetke eńbek sińirgender: 2025 jylǵy memlekettik stıpendııa ıegerleriniń tizimi jarııalandy
Usynylǵan eńbekterdi tirkeý úshin myna qujattar qajet:
- Memlekettik organnyń nemese shyǵarmashylyq odaqtyń usynysy.
- Jınalys hattamasy.
- Shyǵarmashylyq minezdeme.
- Úmitkerdiń jeke is qaǵazy.
- 2 dana sýreti (3*4).
- Usynylǵan eńbektiń 50 danasy.
- Tulǵany rastaıtyn qujattyń kóshirmesi (jeke kýálik nemese tólqujat).
- Shyǵarmanyń avtory jáne shyǵarma jóninde qysqasha naqty málimet (memlekettik jáne resmı (orys) tilderinde).
- Sáýlet óneri týyndylary boıynsha ǵımarattardyń, keshenderdiń óndiriske engizilýin jáne avtorlyq quqyqty rastaıtyn qujattar qosa tirkelýi tıis.
Qujattar men shyǵarmashylyq eńbekter Astana qalasy, Máńgilik el dańǵyly, 8-úı, «Mınıstrlikter úıi» ǵımaratynda ornalasqan Qazaqstan Respýblıkasy Mádenıet jáne aqparat mınıstrliginde qabyldanady.
