Foto: ashyq derekkóz
Kompanııa málimetinshe, 2025 jyldyń jeltoqsan aıynyń sońynda KTK baǵytyndaǵy shekteýlerge baılanysty Qazaqstan munaıy QazTransOıl (QTO) júıesi arqyly ózge eksporttyq marshrýttarǵa baǵyttalǵan.
«Kólemi shamamen 300 myń tonna munaı QTO júıesimen eksporttyq baǵytta jetkizý úshin qaıta baǵyttaldy. Atap aıtqanda, Germanııaǵa, Qytaıǵa, Baký – Tbılısı – Jeıhan baǵytymen, sondaı-aq Novorossıısk pen Ýst-Lýga porttary arqyly jóneltildi. 2026 jyldyń qańtar aıynda da QTO tarapynan munaı qabyldaýdaǵy shekteýler saqtalýyna baılanysty qaıta baǵyttaý sharalary jalǵasady», dep habarlady kompanııa.
Ulttyq kompanııa deregine sáıkes, 2025 jyly Germanııaǵa jetkiziletin Qazaqstan munaıynyń kólemi artqan. Shvedt qalasyndaǵy munaı óńdeý zaýytyna 2,1 mln tonna munaı eksporttalǵan. Al 2026 jyly bul kórsetkishti 2,5 mln tonnaǵa deıin ulǵaıtý josparlanyp otyr.
Sonymen qatar Aqtaý porty arqyly Baký – Tbılısı – Jeıhan baǵytymen tasymaldanǵan munaı kólemi 1,3 mln tonnany qurady. Aldaǵy jyly bul kólem 1,6 mln tonnaǵa deıin ósýi múmkin. Qytaı baǵyty da turaqty saqtalyp otyr. 2025 jyldyń qorytyndysy boıynsha Qytaı Halyq Respýblıkasyna 1,1 mln tonna Qazaqstan munaıy eksporttalǵan.
Konsorsıýmdegi jaǵdaıǵa kelsek, ótken jyldyń 29 qarashasynda Kaspıı qubyr konsorsıýmynyń teńiz termınalyna kezekti shabýyl jasalyp, syrtqy aılaq qurylǵysy aıtarlyqtaı zaqymdanǵan. Buǵan deıin, 25 qarashada túngi dron shabýyly saldarynan Novorossıısk mańyndaǵy KQK teńiz termınalynyń ákimshilik ǵımaratyna da zaqym kelgeni habarlanǵan.
Qazaqstannyń munaıyn tasymaldaıtyn tankerler shabýylǵa ushyrady
Osy oqıǵalardan keıin Qazaqstannyń Energetıka mınıstrligi munaıdy balama baǵyttarǵa burý jóninde málimdegen bolatyn. KQK ınfraqurylymyna qatysty shabýyldarǵa baılanysty pikirdi halyqaralyq seriktester de bildirdi. Atap aıtqanda, jaǵdaıǵa Chevron kompanııasy da túsinikteme jasaǵan.
Budan bólek, Novorossııskidegi «Shesharıs» iri munaı aılaǵyna jasalǵan dron shabýyldary da tirkeldi. Bul keshen arqyly da qazaqstandyq munaı tasymaldanady. Ol kezde Energetıka mınıstrligi munaı qabyldaý men tasymaldaý shtattyq rejımde júrgizilip jatqanyn málimdegen edi.
Aqpan aıynda ýkraınalyq drondar Kaspıı qubyr konsorsıýmynyń «Kropotkınskaıa» stansııasyna shabýyl jasap, tasymal kólemine ýaqytsha shekteý qoıylǵan. Keıin mundaı shabýyldar naýryz aıynda da qaıtalandy. Artynsha Ýkraına men Reseı KQK nysandaryna soqqy jasamaý jóninde kelisimge kelgeni týraly aqparat tarady.
Qalaı bolǵanda da, KQK baǵytyndaǵy qaterler Qazaqstandy eksporttyq logıstıkany ártaraptandyrýǵa ıtermelep otyr. Ulttyq kompanııa málimetinshe, balama baǵyttar arqyly munaı jetkizý jumysy aldaǵy ýaqytta da jalǵasa beredi.
