Saýda jáne ıntegrasııa mınıstrliginiń habarlaýynsha, bıyl 4 qańtardan bastap, elimizde áleýmettik mańyzy bar azyq-túlik taýarlarynyń ýaqytsha keńeıtilgen tizbesi engizildi. Buǵan deıin tizbe 19 ataýdan tursa, qazir ol 31 ataýǵa kóbeıdi. Halyq kóp tutynatyn, áleýmettik mańyzy bar azyq-túliktiń qataryna endi qııar, qyzanaq, alma, shaı, qaımaq, balyq, sıyr eti, taýyq, jylqy eti men qatty irimshik
qosyldy.
Bul ónimderge bekerden beker áleýmettik mańyz berilip otyrǵan joq. Mundaı ónimder – eldiń eń kóp tutynatyn taýarlary. Olardyń baǵasyn ósirýge shekteý qoıylady. Sondyqtan baǵa baqylaýǵa alynady. Áleýmettik mańyzdy ónimderdiń baǵasyna 15 paıyzdan asa saýda ústemesi qosylǵan jaǵdaıda satýshyǵa aldymen eskertý jasalady, odan keıin taǵy qaıtalasa, aıyppul salynady.
Ulttyq statıstıka bıýrosynyń derekterine súıensek, jańa jyldyń alǵashqy aptasyndaǵy ahýal boıynsha áleýmettik mańyzy bar azyq-túlik taýarlary baǵasynyń ındeksi 0,2 paıyzdy quraǵan. Bul ótken jyldyń osy kezeńine sáıkes keledi. Ol kezde de kórsetkish 0,2 paıyz deńgeıinde tirkelgen. «Bıyl atalǵan kórsetkish keńeıtilgen taýarlar tizbesin eskere otyryp qalyptasqanyn atap ótken jón. Eń bastysy, azyq-túlik ónimderiniń quny ósken joq, baǵa turaqty tur», delingen mınıstrliktiń málimdemesinde.
Vedomstvo ókilderiniń sózinshe, keńeıtilgen tizbege engen birqatar jańa taýar túri kerisinshe 0,1–0,5 paıyz aralyǵynda arzandaǵany baıqalǵan. «Baǵa shamaly tómendese de bul baǵany turaqtandyrý úderisiniń bastalǵanyn, az ýaqytta alǵashqy jaqsy nátıjege qol jetkize bastaǵanymyzdy kórsetedi. Mysaly, jemis, kókónis ónimderi boıynsha alma baǵasy – 0,5 paıyzǵa, qııar men qyzanaq 0,4 paıyzǵa arzandady. Bakaleıa ónimderi segmentinde qatty jáne jartylaı qatty irimshikterdiń baǵasy – 0,3 paıyzǵa, qara shaı – 0,2 paıyzǵa tómendedi. Sondaı-aq et jáne balyq ónimderi toby boıynsha baǵa 0,1 paıyzǵa arzandady, al sút ónimderi ishinde qaımaq baǵasynyń 0,1 paıyzǵa arzandaǵany tirkeldi», deıdi mınıstrlik ókilderi.
Baǵany tejeý maqsatynda jyl basynan beri saýda nysandarynda turaqty monıtorıng jasalyp, bıznes ókilderine aqparattyq-túsindirý jumysy qolǵa alynǵan. Jaqynda Saýda jáne ıntegrasııa mınıstrliginiń Saýda komıteti tóraǵasynyń orynbasary Daýlen Kabdýshev jergilikti atqarýshy organdardyń ókilderimen birlesip, elordadaǵy bazarlarda baǵa monıtorıngine sholý jasap, satýshylarǵa túsindirý jumystaryn ótkizdi.
«Osyndaı jumystardy óńirlerdegi áriptesterimiz de qolǵa aldy. Qazir satýshylarǵa buryn ÁMAT tizbesinde bolmaǵan jańa taýarlar tizimge engenin túsindirip aıtyp jatyrmyz. Bul degenińiz, Saýda komıteti tarapynan tizimge qosylǵan taýarlardyń saýda ústemesine memlekettik baqylaý júrgiziledi degen sóz. Qoldanystaǵy zańnamaǵa sáıkes áleýmettik taýarlarǵa qoıylatyn eń joǵary saýda ústemesi 15 paıyzdan aspaýy kerek», deıdi D.Kabdýshev.
