Bári 2024 jyly Atyraýda ótken Ulttyq quryltaıda Memleket basshysynyń «kitap oqıtyn ult» qalyptastyrý týraly usynysynan bastalǵan edi. Qasym-Jomart Kemelulynyń «Shyn máninde, ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», degen sózi Qaztalov aýdanynda da halyq qoldaýyna ıe boldy. Aýdan ákimi Aslanbek Sarqulovtyń bastamasymen mektep oqýshylary arasynda «Men oqyǵan 30 kitap» jobasy uıymdastyryldy.
Áýeli aýdandyq deńgeıde ótken rýhanı joba byltyr oblystyq deńgeıge kóterildi. Sóıtip, bas júldeni shyńǵyrlaýlyq Aızere Jaýymbaı jeńip alyp, 300 myń teńge qarjylaı syılyqqa ıe boldy. Jeńimpazdyń qurmetine bıyl baıqaýdyń oblystyq kezeńi Shyńǵyrlaý aýdanynda ótedi. Al «Men oqyǵan 30 kitap» I respýblıkalyq baıqaýy Qaztalovta qorytyndylanbaq.
Jaqynda osy baıqaýdyń respýblıkalyq kezeńiniń tanystyrylymy ótti. Aıtýly sharaǵa aqyn, «Parasat» ordeniniń ıegeri, Mádenıet jáne bilim berý salasynyń úzdigi, «Eren eńbegi úshin» medaliniń Y.Altynsarın tósbelgisiniń ıegeri, Halyqaralyq «Alash» ádebı syılyǵynyń laýreaty, Qaztalov aýdanynyń Qurmetti azamaty, Jazýshylar odaǵynyń BQO fılıalynyń jetekshisi Darıǵa Mushtanova, «Jaıyq Press» JShS bas dırektorynyń keńesshisi Toqtar Kenjeǵalıev, zııaly qaýym ókilderi qatysty.
– Memleket basshysynyń tapsyrmasyna sáıkes qoǵamda kitap oqý mádenıetin qalyptastyrý maqsatynda aýdanymyzda jas býynnyń zeıinin arttyrý, sanaly urpaq tárbıeleýde osy baıqaýdy jyl saıyn uıymdastyryp, bıyl tipti aýqymyn keńeıtýdi josparlap otyrmyz. Bıyl baıqaýdyń respýblıkalyq kezeń jeńimpazyna 1 mln teńge qarjylaı syıaqy beriledi, – dedi óz sózinde aýdan ákimi.
Igi bastamany Oqý-aǵartý mınıstrligi, Mádenıet jáne aqparat mınıstrligi, Batys Qazaqstan oblysy ákimdigi, «amanat» partııasy, «Adyrna» ulttyq portaly qoldap otyr.
Aıta keteıik, byltyr rýhanı baıqaýdyń oblystyq kezeńine Terekti, Tasqala, Qaratóbe, Jánibek, Bókeı Orda, Shyńǵyrlaý, Jańaqala, Báıterek, Aqjaıyq, Qaztalov aýdandary men Oral qalasynan 15 oqýshy qatysqan edi.
Batys Qazaqstan oblysy
