Foto: yandex.kz
««Baıtaq» partııasy, «Jańarý» sybaılas jemqorlyqqa qarsy qozǵalysy, Respýblıkalyq advokattar alqasy, «Toqtamys» advokattar qaýymdastyǵy, Halyqaralyq arbıtraj jáne medıasııa palatasy, Parlamentarızmdi damytý qory, Ekonomıkalyq saıasat ınstıtýty, «Azamattyq bastama» bastamashylyq toby jáne basqa da uıymdar óz usynystaryn joldady», dedi ol.
Erlan Qarınniń aıtýynsha, jalpy sany, konstıtýsııalyq reformaǵa qatysty 7 saıası partııa, 16 qoǵamdyq uıym óz usynystaryn jibergen. Al, e-Otinish jáne eGov portaldary arqyly azamattar men qoǵam belsendileri tarapynan 600-den astam usynys túsken.
«20 qarashada Memleket basshysy Parlamenttik reforma jóninde jumys keńesin ótkizdi. Prezıdent azamattardan, sarapshylardan jáne qoǵam belsendilerinen túsetin usynystardyń barlyǵyn jan-jaqty zerdeleýdi tapsyrdy. 2 jeltoqsanda Jumys tobynyń ekinshi otyrysy ótti. Jıynda jańa Parlamenttiń quramyna qatysty máseleler qarastyryldy.
Atap aıtqanda, bir palataly Parlamenttiń ókilettik merzimi, depýtattar sany, kvotalar jáne saılaý tártibi talqylandy. 29 jeltoqsanda Jumys tobynyń úshinshi otyrysy ótti. Onda bolashaq Parlamenttegi zań shyǵarý úderisiniń negizgi baǵyttary talqylandy», dedi E.Qarın.
6 qańtarda Memleket basshysy Parlamenttik reforma týraly arnaıy jumys keńesin ótkizgen. Jumys tobyna konstıtýsııalyq reformaǵa qatysty negizgi ustanymdardy ázirleý tapsyrylǵan.
9 qańtarda Jumys tobynyń kezekti tórtinshi otyrysy uıymdastyrylǵan. Onda bolashaq Parlamenttiń basqa bılik ınstıtýttarymen ózara is-qımylyna jáne bir palataly Parlamenttiń ataýyna qatysty usynystar talqylanǵan.
12 qańtarda Memleket basshysy Parlamenttik reforma boıynsha kezekti jumys keńesin ótkizgen. Prezıdent konstıtýsııalyq reformaǵa qatysty túpkilikti sheshimdi elimizdiń azamattary jalpyhalyqtyq referendýmda qabyldaıdy dep naqty aıtqan.
15 qańtarda Jumys tobynyń besinshi otyrysy uıymdastyryldy. Onda jańa Parlamenttiń negizgi memlekettik ınstıtýttardyń qyzmetin qamtamasyz etýdegi quzyreti talqylandy.
«19 qańtarda, ıaǵnı, osy aptanyń basynda Jumys tobynyń altynshy, qorytyndy otyrysy ótti. Oǵan Memleket basshysy ózi qatysty. Jumys tobynyń músheleri Memleket basshysyna atqarylǵan jumystar týraly baıandap, ortaq ustanymdardy tanystyrdy. Prezıdent bul ustanymdarǵa qoldaý bildirip, kóp uzamaı qosymsha óz oılaryn da ortaǵa salatynyn aıtty», dedi Erlan Qarın.
Memlekettik keńesshi Jumys toby jarty jyl boıy belsendi jumys istep, Parlamenttik reformaǵa qatysty máselelerdi 6 otyrysta jan-jaqty talqylanǵanyn aıta kele, Jumys tobynyń barlyq múshelerine belsendi qyzmetteri úshin rızashylyǵyn bildirdi.
Erlan Qarın: Konstıtýsııalyq komıssııanyń qurylýy tarıhı oqıǵa
