Jańa banknotalardy shyǵarý kezinde eski jáne jańa kýpıýralar aınalymda qatar júredi. Iаǵnı, azamattar saýda-sattyqta eski aqshamen de tólem jasap, olardy jańasyna aıyrbastaı alady. Osy ýaqyt aralyǵynda bankter jańa banknotalarmen jumys isteý úshin óziniń bankomattary men kassalyq jabdyqtaryn baptaıdy. Bul tásil aqsha aýystyrý kezinde halyq pen bıznesti asyqtyrmaı, qolaıly jaǵdaı jasaýǵa múmkindik beredi.
«Mysaly, nomınaly 5 000 teńgelik banknotalardyń aınalymda qatar júrý kezeńi 2023 jylǵy jeltoqsannan 2025 jylǵy qyrkúıekke deıin sozylǵandyqtan, halyq pen bıznes eski aqshalardy jańasyna esh kedergisiz aýystyrýǵa múmkindik aldy. Búgingi tańda aınalymda qalǵan eski úlgidegi banknotalardyń kólemi 1%-dan az. Olar bankterge keıin de túse beredi, al keıbir bóligi joǵalyp, syrtqa áketilýine nemese kolleksııa túrinde saqtalýyna baılanysty qaıtpaýy da múmkin», dep túsindirdi Ulttyq bank.
2026 jyly nomınaly 2 000 jáne 10 000 teńgelik banknotalar úshin aınalymda qatar júrý kezeńi aıaqtalady:
- 10 000 teńge – 2024 jylǵy 28 maýsymnan 2026 jylǵy 27 maýsymǵa deıin;
- 2 000 teńge – 2024 jylǵy 25 jeltoqsannan 2026 jylǵy 24 maýsymǵa deıin.
Ulttyq bank tóraǵasy azamattarǵa ıpotekaǵa úı alýdy keıinge qaldyrýǵa keńes berdi
Ulttyq Bank 10 000 teńgelik banknotalardyń aınalymda qatar júrý merzimin uzartý múmkindigin qarastyryp jatyr. Sebebi ol banknotalar halyq pen kásipkerler arasynda keńinen taralǵan.
Ulttyq bank bazalyq mólsherlemeni 18% deńgeıinde saqtap qaldy
Onyń ústine, 2 000 men 10 000 teńgelerdiń aınalymda qatar bolý ýaqyty bir mezgilde aıaqtalatyndyqtan, bank júıesine qosymsha aýyrtpalyq salýy múmkin. Sol sebepti, merzimdi uzartý halyq pen bızneske eski banknotalardy jańasyna birtindep ári yńǵaıǵa qaraı aýystyrýǵa kómektesedi, sondaı-aq eski úlgidegi banknotalardyń tabıǵı tozýyn qamtamasyz etedi.
Jańa jáne eski úlgidegi banknotalar aınalymda qatar bolǵan kezeńde zańdy tólem quraly bolyp qala beredi, olar óz qunyna saı elimizdiń búkil aýmaǵynda tólemder men aýdarymdarda, bank shottaryna esepteýde qabyldaýǵa jatady.
