Sora ósirip sorlady

Ońaı olja arqyly tez baıyp ketýdi armandaıtyndar az emes. «Jeńildiń astymen, aýyrdyń ústimen» júrip, mańdaı ter, taban aqysyz qaltasyn qampaıtqysy keletinder qashanda bolǵan. Degenmen, onyń barlyǵy zań buzýshylyqqa ákep soǵady. Nátıjesi belgili. Temir tordyń arǵy betinen bir-aq shyǵady. Búginde respýblıka aýmaǵynda «Kóknar» jedel-profılaktıkalyq sharasy júrip jatyr. Bul iske qyzylordalyq polıseıler de tyńǵylyqty kirisip ketken. Osy shara barysynda Aral aýdany, Jińishkequm aýylynan shyǵysqa qaraı 45 shaqyrym jerde esirtki zatyna uqsas ósimdik ósip turǵan 5 alqap anyqtalǵan. Tekserý jumystary kezinde zańmen tyıym salynǵan 3704 túp sora ósimdigin kútip-baptap jatqan jerinen 57 jastaǵy, 45 jastaǵy jáne 32 jastaǵy úsh azamat ustaldy. Alqaptaǵy ósimdiktiń jalpy salmaǵy 3 tonna 333 kılony quraǵan. Sonymen qatar, seziktilerdiń ja­tyn oryndaryna tintý júrgizý kezinde jalpy salmaǵy 28 kılo 77 túp kep­tirilgen sora ósimdigi tabyldy. Anyq­talǵan aıǵaq zattar psıhotroptyq zattar men prekýrsorlardy zertteý sot-saraptamasyna jiberildi. Qazirgi tańda atalǵan úsh azamattyń ústinen Qazaqstan Respýblıkasy Qylmystyq kodeksiniń 300-baby, 1-bóligi boıynsha qylmystyq is qozǵalyp, sotqa deıingi tergep-tekserý amaldary júrgizilýde. Úsh azamat ta ýaqytsha ustaý abaqtysyna qamaqqa alyndy. Erjan BAITILES, «Egemen Qazaqstan». Qyzylorda oblysy.