Azyq-túlik: Baǵa ósimi baıaýlady, biraq qysym joǵary
Jyldyq esepte azyq-túlik baǵasy 12,9%-ǵa ósti, al jeltoqsanda bul kórsetkish 13,5% bolǵan. Jalpy ınflıasııaǵa qosqan úlesi 5,4%-dy qurady.
- Et pen qus eti bir jylda 23%-ǵa qymbattap, eń joǵary ósim tirkeldi.
- Shujyq ónimderiniń baǵasy 19%-ǵa, alkogolsiz sýsyndar 16,8%-ǵa artty.
- Kókónis baǵasy 2,7%-ǵa tómendep, azyq-túlik sebetindegi jalpy ósimdi ishinara tejedi.
Azyq-túlikke jatpaıtyn taýarlar
Azyq-túlikke jatpaıtyn taýarlar baǵasy jyldyq mánde 11,7%-ǵa ósti. Bul jeltoqsandaǵy 11,1%-dan joǵary. Aqyly qyzmetter quny 12%-ǵa qymbattap, aldyńǵy aıdaǵy deńgeıin saqtady.
Negizgi ósim turǵyn úı-kommýnaldyq sektor men turǵyn úıdi jalǵa alý naryǵyna tıesili:
- Ballondaǵy suıytylǵan gaz baǵasy − 24,7%;
- Sý burý qyzmeti − 18,7%;
- Turǵyn úıdi jalǵa alý aqysy − 12,3%;
- Benzın − 16,8 paıyz;
- Sýyq sý tarıfi −12,9%-ǵa tómendegenimen, bul jalpy tólemder ósimin óteı almady.
Aılyq kórsetkishter qańtardaǵy ınflıasııanyń burynǵy jyldardan ózgeshe ekenin kórsetti. Bir aıda azyq-túlik baǵasy 0,8%-ǵa, azyq-túlikke jatpaıtyn taýarlar 1,2%-ǵa, aqyly qyzmetter 1,1%-ǵa ósti. Aldyńǵy jyldary qańtarda baǵa ósimin kóbine azyq-túlik aıqyndasa, bıyl qysym ónerkásip taýarlary, janarmaı jáne qyzmet kórsetý salasyna aýysty. Bul ınflıasııalyq úderisterdiń qurylymy kúrdelenip, turaqty sıpat alyp bara jatqanyn bildiredi.
Ekonomıst Rýslan Sultanov jyldyq ınflıasııa báseńdegenimen, aılyq ósimniń nege jedeldegenin túsindirdi.
«Bul jerde 2025 jyldyń sońyndaǵy baza áseri bar jáne qyzmet kórsetý salasynda jyldyq esepte salqyndaý jalǵasyp keledi. Al qańtar aıynda kúntizbelik qaıta esepteýler men ındeksasııalar júredi, sonyń saldarynan azyq-túlikke jatpaıtyn taýarlar men servıstik segmentte aılyq ósim baıqalady», dedi sarapshy.
Onyń aıtýynsha, aılyq ınflıasııaǵa negizgi úlesti azyq-túlikke jatpaıtyn taýarlar men qyzmetter qosty.
«Bul – jyldyń basyndaǵy baǵa túzetýleri. Al azyq-túlik baǵasy aıtarlyqtaı shoksyz, qalypty ósti. Jyldyq keskinde qysym áli de azyq-túlik pen kólik tarapynan bolyp otyr, ony keıbir kommýnaldyq qyzmetterdiń arzandaýy ǵana ishinara jumsartyp otyr», dep naqtylady ol.
