Sýretti túsirgen – Dmıtrıı Erofeev
Áýeli I.Jansúgirov atyndaǵy mádenıet saraıynyń aldynda turǵan 14 appaq «temir tulpar» kóptiń nazaryn ózine aýdardy. Bul jolǵy qurmet óner maıtalmandarynyń tóbesin kókke tıgizgendeı áser etti. Sebebi bir kúnde mádenıet qyzmetkerlerine osynsha kóliktiń kiltin tabystaý aımaq tarıhynda alǵash ret jasalyp otyr desek, asyra aıtqandyǵymyz emes.
Oblys ákiminiń orynbasary Dıas Esdáýletov óner salasynda júrgen árbir jannyń eńbegi erekshe ekenin aıta otyryp, sala qyzmetkerlerin quttyqtady.
«Mádenıet salasynyń tehnıkalyq bazasy búgin shaǵyn avtobýstarmen jáne júk kólikterimen tolyqqaly otyr. О́ner adamdary únemi halyq arasynda, kóptiń aldynda júredi, árdaıym izdeniste bolyp, el-jer aralaıdy. Sondyqtan bul kólikter mádenıet ujymdarynyń gastroldik saparlarǵa shyǵýyna, qajetti qural-jabdyqtar men dekorasııalardy tasymaldaýyna, túrli festıval, baıqaýǵa qatysýyna múmkindik týǵyzyp, jumys sapasyna oń áser etedi dep senemiz», degen Dıas Rahmetuly saltanatty is-sharada tek kólikter berýmen ǵana shektelmeı, ekinshi jyl qatarynan ótkizilip keletin «Jer jánnaty – Jetisý» telejoba baıqaýyna belsene qatysyp, óner kórsetken óńirler de marapattalatynyn tilge tıek etti.
Jetisý oblysynyń 8 aýdandyq jáne 2 qalalyq Mádenıet úılerine, sondaı-aq Sáken Seıfýllın atyndaǵy ámbebap kitaphanasyna, Kórkemsýret galereıasyna, oblystyq memlekettik arhıvke jáne Halyq shyǵarma- shylyǵy ortalyǵyna tıesili kólikterdiń kilti tabys etildi.
Jańa kólikke ıe bolǵan mekeme ujymdarynyń atynan Alakól aýdandyq Zeınep Qoıshybaeva atyndaǵy mádenıet úıiniń dırektory Otan Smaǵulov sóz sóılep, rızashylyǵyn bildirdi.
«Sala nysandaryna bir kúnde osynsha kólik berý oqıǵasy alǵash ret bolyp tur. Bul – ulttyq qundylyqtardy nasıhattap júrgen azamattarǵa kórsetilip otyrǵan qamqorlyq, bizge shyǵarmashylyq serpilis beretin ıgilikti is. Bir ǵana bizdiń Alakól aýdanynda 4 jańa mádenıet nysany salynyp jatyr, sonyń bireýi jýyrda paıdalanýǵa beriledi, 3-eýi kelesi jyldyń úlesinde. Aldaǵy ýaqytta da mádenıet úshin eseli eńbek ete beremiz», dedi ol.
Sap túzegen «temir tulparlardy» shyǵaryp salǵan jurt I.Jansúgirov atyndaǵy mádenıet saraıyna kirdi. «Jer jánnaty – Jetisý» telejoba baıqaýynyń jeńimpazdary dıplom jáne qarjylaı syılyqtarmen marapattaldy.
Atap aıtsaq, arnaıy júlde jáne 300 myń teńge aqshalaı syılyq Qaratal aýdanyna, III oryn jáne 500 myń teńge aqshalaı syılyq Sarqan aýdanyna, II oryn jáne 700 myń teńge aqshalaı syılyq Aqsý aýdanyna buıyrdy. Al I oryn jáne 1 mln teńge aqshalaı syılyqqa Kerbulaq aýdany laıyq dep tabyldy. Telejoba baıqaýynyń bas júldesin jáne 5 mln teńge qarjylaı syılyqty Kóksý aýdany jeńip aldy.
«Bul dástúrli doda áli de jalǵasady. Biz óńirdegi mádenıettiń órkendeýine bar kúsh-jigerimizdi salamyz. Ásirese shalǵaı aýyldardyń rýhanı ómirinde úlken ózgerister bolyp jatyr. Baba dástúrin jalǵastyrýǵa beıil jastar kóp», dedi oblystyq mádenıet, arhıvter jáne qujattama basqarmasynyń basshysy Qýanysh Súleımenov.
Marapattan keıin rýhanı sharanyń gala-konserti bastaldy. Joba erejesine saı ár nomınasııa boıynsha jeńimpazdar óner kórsetti. Halyq ánderi men zamanaýı estrada janryndaǵy áýezdi ánder, termeshilerdiń taǵylymdy tolǵaýy, ulttyq bı álemi, aıtys aqyndarynyń arnaýy alma-kezek aýysyp otyryp kórermenniń kóńil kókjıegin keńitken ádemi keshke ulasty.
Jetisý oblysy
