Foto: istockphoto.com
Atalǵan komıtettiń túsindirýinshe, endi salyq bereshegi 20 aılyq eseptik kórsetkishten, ıaǵnı 86,5 myń teńgeden asqan jaǵdaıda azamattardyń esepshottary buǵattalady. Aldymen salyq tóleýshige resmı habarlama joldanady, sodan keıin bank shottary boıynsha shyǵys operasııalary, kassa jáne ınkassalyq ókimder ýaqytsha toqtatylady.
Qaısar Arynnyń aıtýynsha, qaryz mólsheri 45 AEK-ke (194,6 myń teńge) deıin jetken jaǵdaıda shekteý osy sharalarmen ǵana shekteledi. Eger bereshek osy deńgeıden assa, onda debıtorlyq qaryzdy óndirip alý, múlikti túgendeý, ony ótkizý, tipti salyq tóleýshini sot sheshimimen bankrot dep tanýǵa deıingi sharalar qoldanylady.
Qasym-Jomart Toqaev: Salyq tóleý otanshyldyqtyń ozyq úlgisine aınalady
Sonymen qatar salyq qaryzyn óteý kezinde ósimpul men aıyppuldy esepten shyǵarý tetigi de qarastyrylǵan. Memlekettik kirister komıtetiniń ókili Úkimet mıkro jáne shaǵyn bıznes sýbektilerine arnalǵan arnaıy jeńildikter paketin ázirlegenin atap ótti.
Q.Arynnyń túsindirýinshe, jańa Salyq kodeksine beıimdelý kezeńin jeńil ótkizý úshin mıkro jáne shaǵyn bızneske qatysty keshendi sharalar qabyldandy. Qarjy mınıstriniń buıryǵy ázirlenip, qazir Ádilet mınıstrliginde qaralyp jatyr. Eger ol maquldansa, resmı túrde tirkelip, jarııalanady. Bul jeńildik tek salyq qaryzy bar jáne bıýdjet jiktemesiniń tıisti kodtary boıynsha bereshegi bar mıkro jáne shaǵyn bızneske qatysty.
Mıkro jáne shaǵyn bıznes salyqtyq ákimshilendirýdi «taza paraqtan» bastaıdy
Qaısar Arynnyń aıtýynsha, eger salyq tóleýshi 1 qańtar men 31 naýryz aralyǵynda negizgi qaryzyn ótese, salyq organy ósimpul men aıyppuldy avtomatty túrde esepten shyǵarady. Bul norma bankrottyq, ońaltý nemese qaıta qurylymdaý rásiminde turǵan kásiporyndarǵa da qatysty.
«Sot sheshimimen osy rásimderde turǵan salyq tóleýshiler belgilengen merzimde mindettemelerin oryndasa, olardyń da ósimpuldary men aıyppuldary keshiriledi. Budan bólek, qosylǵan qun salyǵy boıynsha tirkeýge turmaǵany úshin Ákimshilik kodekstiń 275-babynyń 5-tarmaǵynda kózdelgen aıyppuldar da alynyp tastalady», dedi atalǵan komıtet ókili.
Taǵy bir mańyzdy ózgeris – iri salyq bereshegi bar tulǵalarǵa qatysty shekteýler. Eger qaryz mólsheri 27 myń AEK-ten, ıaǵnı 100 mln teńgeden assa, kompanııanyń birinshi basshylaryna elden shyǵýǵa tyıym salynady. Bul norma 2026 jylǵy 1 shildeden bastap kúshine enedi.
Aıta keteıik, jańa Salyq kodeksinde salyq bereshegin májbúrlep óndirip alý úshin eń tómengi shek 6 AEK (23 592 teńge) deńgeıinde belgilenetini de habarlanǵan. Sonymen birge bıznesten salyq qaryzyn májbúrlep óndirý qaǵıdalaryn qaıta qaraý josparlanyp otyr.
Mamandar bul ózgeristerdi salyq tártibin kúsheıtýmen qatar, adal salyq tóleýshilerge qoldaý kórsetýge baǵyttalǵan qadam dep baǵalap otyr.
