Foto: Kapital.kz
Mıllıardtardy eselegen mámile
Forbes baǵalaýynsha, SpaceX pen jasandy ıntellekt salasynda jumys isteıtin xAI kompanııasynyń birigýi Ilon Masktyń dáýletin birden 84 mlrd dollarǵa ulǵaıtqan. Sonyń nátıjesinde onyń baılyǵy 852 mlrd dollarǵa jetip, Mask adamzat tarıhynda mundaı mejeden asqan alǵashqy tulǵa atandy. Birikken kompanııanyń naryqtyq quny 1,25 trln dollar dep baǵalanyp otyr.
Mámilege deıin Mask SpaceX aksııalarynyń shamamen 42 %-yna (336 mlrd dollar) jáne xAI aksııalarynyń 49 %-yna (122 mlrd dollar) ıe bolǵan. Birigý nátıjesinde SpaceX 1 trln, al xAI 250 mlrd dollar dep baǵalanyp, kásipker birikken qurylymnyń 43%-yn baqylaýda ustap otyr. Bul úlestiń quny 542 mlrd dollarǵa teń.
Ilon Mask 600 mlrd dollary bar jer betindegi alǵashqy adam atandy
Negizgi aktıvter jáne bolashaq áleýet
SpaceX búginde Ilon Masktyń eń qymbat aktıvine aınaldy. Sonymen qatar onyń ıeliginde Tesla kompanııasynyń 12% aksııasy bar, onyń naryqtyq quny shamamen 178 mlrd dollardy quraıdy. Buǵan qosa, Masktyń 124 mlrd dollar kóleminde opsıondary bar. Bul esepke Tesla-daǵy rekordtyq syıaqy paketi kirmegen. Eger kompanııa alǵa qoıǵan maqsattaryna jetse, atalǵan syıaqy kásipkerge 1 trln dollarǵa deıin aksııa ákelýi múmkin.
Bul Ilon Mask úshin sońǵy bir jyldaǵy ekinshi aýqymdy korporatıvtik birigý bolyp otyr. 2025 jyldyń naýryz aıynda ol xAI men X platformasyn (burynǵy Twitter) biriktirgen edi. Ol kezde xAI 80 mlrd, al X 33 mlrd dollar dep baǵalanǵan.
Álemdik baılyq teńgerimindegi ózgeris
Aıta keteıik, Oxfam qaıyrymdylyq uıymynyń esebine sáıkes, 2025 jyly álemdegi dollarlyq mıllıarderlerdiń jıyntyq baılyǵy 16%-ǵa ósken. Bul sońǵy 5 jyldaǵy ortasha jyldyq ósimnen 3 ese joǵary kórsetkish. О́tken jyly mıllıarderler sany alǵash ret 3000-nan asty. Al Ilon Mask buǵan deıin-aq tarıhta baılyǵy 500 mlrd dollarǵa jetken alǵashqy adam retinde tirkelgen.
Sarapshylar Masktyń jańa rekordyn tehnologııalyq transformasııa men kapıtaldyń shoǵyrlaný úrdisiniń aıqyn kórinisi dep baǵalap otyr.
