Osy kúnge deıin Áýezov teatrynyń muraǵatynda 200 myńǵa jýyq qundy jádiger jınaqtalsa, onyń eń basty ereksheligi – Almaty mýzeıimen birinshi ret ótkizilip otyrǵan kórmege eksponattardyń 100 túpnusqasy qoıylǵan. Bir jaǵynan, qala mýzeıi de óz tarapynan kórmege mádenıet bóliminiń qorynda saqtalǵan 50 dúnıeni qosyp otyr.
Aıtqandaı, bul kórmeniń bir bóligi «Ǵasyr jasaǵan ult teatry» gastroldik saparlarymen birge Qostanaı, Qaraǵandy, Túrkistan, Taraz, Shymkent shaharlaryna da baryp qaıtqan eken. Jyljymaly kórmeniń keshendi bóligi Respýblıka saraıyndaǵy teatrdyń 100 jyldyǵyna oraı uıymdastyrylǵan aýqymdy mádenı sharada saltanat qurdy.
Júz jyldyq tarıhty Almaty mýzeıindegi aıadaı kórmege syıdyrý qıyn desek te, teatrdyń negizgi shejiresi JI kómegimen jasalǵan beınebaıandar arqyly mýzeıdiń tórt úlken ekranynda shyr kóbelek aınalady.
Eń qundy jádigerlerge keletin bolsaq, sonaý 30-jyldardan beri saqtalǵan ishik pen toqylǵan shapan janynda bir sátke bolsa da aıaldatyp, oıǵa shomdyrmaı qoımaıdy. Bul shapandarda Jumat Shanın, Qalıbek Qýanyshbaev, Ámire Qashaýbaev, Isa Baızaqov syndy sahna sańlaqtarynyń teri men ıisi sińgenine kúmánińiz bolmasyn.
Onyń ber jaǵynda ulttyq mádenıetke jankeshtilikpen qyzmet etken Ánýar Moldabekov, Ydyrys Noǵaıbaev, Ázirbaıjan Mámbetov, Habıba Elebekova, Hadısha Bókeeva, Sábıra Maıqanova, Farıda Sháripova, Torǵyn Tasybekova, Asanáli Áshimov sııaqty kórnekti óner maıtalmandarynyń jarqyraǵan beınelerin, qoıylymdardaǵy kostıýmderin tamashalaýǵa bolady.
Mysaly, Ánýar Moldabekovtiń «Vanıa aǵaı» spektaklindegi, Sholpan Jandarbekovanyń «Aqan seri – Aqtoqty», Zámzágúl Sháripovanyń «Otello» spektaklinde Dezdemona rólinde kıgen, Tuńǵyshbaı Jamanqulovtyń Abylaı han beınesindegi sahnalyq kıimderi kózimizge ottaı basylady.
Bir sózben aıtqanda, kórmede Almaty mýzeıi men M. Áýezov atyndaǵy Qazaq ulttyq drama teatry mýzeıiniń qorynan alynǵan teatr tarıhyna qatysty biregeı arhıvtik qujattar men fotosýretter, 40-jyldardan búginge deıingi spektakl afıshalary, sarǵaıǵan baǵdarlamalar, tipti repertýardan túsip qalǵan qoıylymdardyń kórinisterin tamashalaýǵa bolady.
ALMATY
