Otyrysty ashqan QHP Parlamenttik fraksııasynyń jetekshisi, Zańnama jáne sot-quqyqtyq reforma komıtetiniń hatshysy, Konstıtýsııalyq reforma jónindegi komıssııanyń múshesi Magerram Magerramov Memleket basshysynyń bastamalary eldi kezeń-kezeńimen jańa Konstıtýsııa ázirleýge alyp kelgenin atap ótti. Onyń aıtýynsha, usynylyp otyrǵan joba memlekettik basqarý júıesiniń túbegeıli jańarýyn kózdeıdi.
«Joba elimizdiń memlekettik saıasatynyń jańa baǵdaryn aıqyndaıdy. Bir palataly Quryltaı qurylady, jańa Joǵary konsýltatıvtik organ – Halyq keńesine arnalǵan jeke bólim engiziledi, sondaı-aq Vıse-prezıdent ınstıtýty qalyptasady. Munyń barlyǵy memlekettik bılik arhıtektýrasynyń múlde jańa qurylymyn jasaıdy», dedi depýtat.
Qazaqstan Halyq partııasy jańa Konstıtýsııa jobasyn tolyq qoldaıtynyn bildirdi. Spıkerler qujattyń adamǵa baǵdarlanǵan sıpatyn erekshe atap ótti. Joba ómir súrý quqyǵyn absolıýttendirýdi, jeke tulǵaǵa qol suǵylmaýshylyǵyn, sıfrlyq jeke derekterdiń qorǵalýyn, sondaı-aq azamattardyń ar-namysy men qadir-qasıetin jáne áleýmettik quqyqtaryn, sonyń ishinde eńbek etý quqyǵyn qorǵaýdy kúsheıtýdi kózdeıdi.
Áleýmettik zertteý: Qazaqstan halqynyń 85%-y jańa Konstıtýsııa jobasyn qoldady
QHP depýtaty Irına Smırnova partııa ustanymynyń ózeginde adam turǵanyn aıtty.
«Bizdiń partııa ekonomıka adamǵa qyzmet etýi kerek ekenin únemi aıtyp keledi. Eńbek adamy – bul resýrs ta, birlik te emes, ol – memlekettiń negizi jáne kúshi», dedi ol.
Konstıtýsııa jobasynyń quqyqtyq mánine Ádilet vıse-mınıstri Laýra Mersalımova toqtaldy. Onyń sózinshe, jańa redaksııa el damýynyń qazirgi kezeńin naqty beıneleıdi.
«Azamattardyń quqyqtary men mindetterine arnalǵan bólimde quqyq pen bostandyqty qorǵaýdyń naqty kepildikterin kúsheıtýge basymdyq berildi. Bul rette halyqaralyq qujattardyń talaptary tolyq eskerildi», dedi vıse-mınıstr.
Qazaqstannyń Azamattyq alıansy konstıtýsııalyq reformany qoldady
Jıyn barysynda Senat depýtaty Ǵalıasqar Sarybaev «Jańa Konstıtýsııa – el damýynyń jańa kezeńi, qoǵam suranysy men ýaqyt talaby» taqyrybynda baıandama jasady. Májilis depýtaty Marat Bashımov Ata zań jobasynyń quqyq qorǵaý áleýetin saralady. Astana halyqaralyq ýnıversıteti Joǵary quqyq mektebiniń professory Isıdor Borchashvılı qujattyń strategııalyq baǵyttaryna toqtalsa, Zańnama jáne quqyqtyq aqparat ınstıtýtynyń dırektory Indıra Áýbákirova jańa Konstıtýsııa sheńberinde qalyptasatyn negizgi qaǵıdattar men jalpyulttyq qundylyqtardy ilgeriletý máselesin kóterdi.
Sondaı-aq otyrysta «Assambleıa jastary» respýblıkalyq qoǵamdyq birlestiginiń tóraǵasy Tımýr Jumyrbaev, «Astana zańgerler lıgasy» zań konsýltanttary palatasynyń tóraıymy Aınur Abatova jáne Prezıdent Is basqarmasy janyndaǵy Parlamentarızm ınstıtýty Jeke zańnama ortalyǵynyń basshysy Iýlııa Kostıanaıa pikir bildirdi.
Jıyndy qorytyndylaǵan Magerram Magerramov Konstıtýsııa jobasyna qoǵamnyń belsendi qatysqanyn atap ótti.
«Konstıtýsııaǵa qatysty pikir bildirmegen, beı-jaı qalǵan birde-bir adam joq. Usynylyp otyrǵan jobada Ata zańnyń árpi men rýhynyń tepe-teńdigi qazirgi kezeńniń shynaıy suranysyna saı saqtalǵan», dedi ol.
«Ádiletti Qazaqstan» qaǵıdattaryna negizdelgen jańa Konstıtýsııa jobasy boıynsha jumys aldaǵy ýaqytta da jalǵasady.
Konstıtýsııa jobasy partııalyq pikirtalas taqyrybyna aınaldy
