Foto: Energetıka mınıstrligi
Mınıstrlik dereginshe, jobanyń bastapqy quny 8 trln teńgeden asady. Qujat eldegi energııa tapshylyǵyn joıýdy, moraldyq ári fızıkalyq turǵydan eskirgen elektr stansalaryn jańartýdy kózdeıdi. Jospar ınvestısııa tartý, otyn-logıstıkalyq ınfraqurylymdy damytý jáne kadrlyq áleýetti kúsheıtý sekildi ózara baılanysty baǵyttardy qamtıdy.
«Ulttyq joba saladaǵy barlyq baǵyttardy keshendi ári jan-jaqty damytýǵa arnalǵan. Bul – ınvestısııa tartýdan bastap, otyn-logıstıkalyq ınfraqurylymdy jetildirý men kadrlyq áleýetti nyǵaıtýǵa deıingi teńdestirilgen tásil. Mundaı júıeli qadam ekonomıkanyń mýltıplıkatıvtik áserin kúsheıtip, eldiń turaqty damýyna qyzmet etedi», dedi Energetıka mınıstri Erlan Aqkenjanov.
6 jańa stansa jáne jańǵyrtý jumystary
Ulttyq jospar aıasynda 6 iri energetıkalyq nysan salý kózdelgen. Olar – Ekibastuz MAES-3, Kýrchatov, Kókshetaý, Semeı, О́skemen jáne Jezqazǵan qalalaryndaǵy jańa stansalar. Buǵan qosa, qazir jumys istep turǵan Ekibastuz MAES-2 men Aqsý MAES-in tehnıkalyq jańǵyrtý josparlanyp otyr.
Jańa jobalardy iske asyrý úshin ınvestorlar ashyq tender arqyly tańdalady. Al qoldanystaǵy stansalardy jańartý mınıstrlikpen jasalatyn ınvestısııalyq kelisimder negizinde júzege asady. Bul tásil jobanyń ashyqtyǵyn qamtamasyz etip, uzaq merzimdi kelisimder sheńberinde tarıfterdiń boljamdylyǵyn saqtaýǵa jáne ınvestısııalardyń qaıtarymdylyǵyn qamtamasyz etýge múmkindik beredi.
«Taza kómir» jáne ekologııalyq tepe-teńdik
Mınıstrliktiń málimdeýinshe, jobada «taza kómir» tehnologııalaryna erekshe basymdyq berilgen. Zamanaýı energetıkalyq bloktar joǵary tıimdilik koeffısıentimen erekshelenip, ekologııalyq talaptarǵa jaýap berýi tıis.
«Bizdiń maqsat – moraldyq jáne fızıkalyq turǵydan eskirgen qýattardy kezeń-kezeńimen tıimdiligi joǵary, zamanaýı energetıkalyq bloktarmen almastyrý. Bul ekologııa talaptary men energetıkalyq qaýipsizdik arasyndaǵy tepe-teńdikti saqtaýǵa múmkindik beredi», dedi E.Aqkenjanov.
Gıdroenergetıkalyq áleýetti qalaı arttyramyz? Elimizde biryńǵaı sıfrlyq platforma qurylmaq
Kómir, temirjol jáne kadr máselesi
Jańa qýattardy tıimdi engizý úshin kómir óndirý kólemin arttyrý jáne temirjol ınfraqurylymyndaǵy ótkizý qabileti shekteýli ýchaskelerdi joıý mańyzdy. Osyǵan baılanysty mınıstrlik kómir óndirisin ulǵaıtý men temirjol jelisindegi «tar tustardy» joıý máselelerin qatar qarastyryp otyr.
Ulttyq jospardyń áleýmettik bóliginde de naqty tetikter bar. Onda personaldy qorǵaý sharalary, sondaı-aq «Otbasy bankpen» birlesip, energetıka salasy qyzmetkerlerine arnalǵan arnaıy turǵyn úı baǵdarlamalaryn iske qosý kózdelgen.
Mınıstrlik usynǵan barlyq bastamalar múddeli taraptarmen jan-jaqty pysyqtalǵannan keıin, kómir generasııasyn damytýdyń Ulttyq jospary sońǵy nusqada bekitiledi. Bul qujat Qazaqstannyń energetıkalyq qaýipsizdigin nyǵaıtyp, aldaǵy jyldardaǵy turaqty damýyna negiz bolmaq.
